Un òme a tirat pendent lo discors de la ganhanta, l’independentista Pauline Marois, qu’es salva. I a un mòrt e un ferit grèu. L’agressor es estat interpelat. Lo Partit Quebequés a ganhat las eleccions en tombant los liberals. Los autonomistas demòran luènh de çò qu’esperavan.

La nòva primièra ministra de Quebèc, Pauline Marois, es estada victima d’un atemptat pendent la matinada, segon l’ora nòstra, al moment que fasiá lo discors per celebrar la victòria del sieu partit, l’independentista Partit Quebequés, dins las eleccions debanadas ièr. Pendent que s’adreiçava al sieus simpatizants a Métropolis, un òme a tirat de còps de fuòc en provocant un mòrt e un ferit grèu, segon qualques mèdias quebequeses; Marois es indemna de l’atac e l’an emportada sul pic en defòra del scenari. L’atacant, un òme d’unes cinquanta ans, es estat interpelat.
 
De fonts policièras an raportat que l’autor de l’atemptat es intrat dins l’endrech ont se fasiá l’acte e a tirat almens un còp de fuòc contra caduna de las victimas, que segon lo jornal Les Presses son dos tecnicians.
 
Après aver tirat contra las doas victimas, l’atacant a incendiat una bastissa que i aviá a costat e a fugit a pè. La polícia l’a arrestat.
 
Los imatges dels mèdias quebequeses mòstran un individú vestit de negre e amb capucha. Quand l’an interepelat a cridat: “l’anglés se desvelha”, segon Radio Canada.
 
Un còp interpelat, Marois es tornada sul scenari per demandar als assistents de se n’anar  tranquillament.
 
Los resultats de las eleccions quebequesas confirman çò que disián los sondatges: i aurà un govèrn independentista. Lo Partit Quebequés a obtengut 54 sètis a l’Assemblada Nacionala (la majoritat absoluta es de 62). La segonda plaça es pel Partit Liberal, fins a l’ora d’ara al poder e partidari de manténer Quebèc dins Canadà, amb 50 sètis. Avenir Québec, una formacion federalista desencantada del projècte independentista, a obtengut de resultats fòrça mai basses de çò que prevesián los sondatges, amb 19 deputats. L’estonament es l’ascension al parlament de l’esquèrra radicala independentista de Quebèc Solidari, qu’a capitat dos sètis a Montréal. Fins ara n’aviá solament un.
 
Gaireben sièis milions de quebequeses an participat a las eleccions per decidir los 125 deputats de l’Assemblada Nacionala. Los liberals, que i govèrnan dempuèi nòu ans, son estats esposcats pels escandals de corrupcion e an afrontat una protèsta d’estudiants sens precedents per l’aumentacion dels prèses de las inscripcions universitàrias, çò que los obliguèt d’avançar las eleccions de quinze meses.
 
Lo PQ a parlat de celebrar un nòu referendum d’independéncia coma los qu’organizèt en 1980 e en 1995. “Vòli retornar lo Quebèc sus lo camin de la sobeiranetat e la manièra d’i arribar es de capitar lo sosten d’una majoritat de ciutadans, que desiren que los lors interèsses sián defenduts melhor”, çò a dich Pauline Marois. Ça que la, lo PQ auriá de besonh del sosten d’un dels autres dos partits majoritaris. Los liberals s’i opausan, del temps que la coalicion nacionalista Avenir Québec, dins la siá primièra campanha, parlava de se concentrar sus l’economia e de quitar l’idèa d’un referendum pendent dètz ans. Al delà del retorn al poder del PQ, que governèt de 1976 a 1985 e de 1994 a 2003, Quebèc aurà pel primièr còp dins l’istòria una primièra ministra: la candidata del partit, Pauline Marois.
 
 
_____
Mai informacions sus: Le Journal de Québec, Le Devoir, Montreal Gazzette, Canoe, La Presse, Huffington Post Québec, Radio Canada

Los resultats electorals