La populacion africana d’elefants es en declin. Entre 2007 e 2014 s’es vista reducha de mai del 30%, segon lo nòu Recensament Mondial dels Elefants (Great Elephants Census). La causa màger de la casuda d’aquela populacion es la caça illegala que provòca fins a un tombament annal de mai del 8% d’elefants sus tot lo continent african.
 
D’un costat, “lo braconatge es totjorn la principala rason de la pèrda d’elefants africans”, çò diguèt Ibrahim Thiaw, director executiu del Programa per l’Environament de las Nacions Unidas. “Çò qu’a l’ora d’ara a pas cap de sens a cap de nivèl, ni moral ni economic ni politic”.
 
D’un autre costat, Patricia Awori, de la Coalicion per l’Elefant African assegurèt qu’aquel nombre —a respècte de la casuda del 30% de la populacion africana d’elefants— es estonant e que cal prene de mesuras urgentas e coerentas se volèm vertadièrament salvar l’elefant african.
 
Lo nòu recensament d’elefants de 2016 es lo resultat del finançament del cofondador de Microsoft, Paul Allen, que donèt mai de 7 milions de dolars en 2010 per lo far e qu’ongan a tanben balhat mai de 18,6 milions de dolars per la meteissa causa.
 
Aital, en 2014, una còla de cercaires explorèron Africa tota dins plusors avions e comptèt 352 000 elefants de savana, dont lo 98% demòran en 18 païses africans mas mai del 50% solament en Botswana e Zimbabwe.
 
Los scientifics tanben an trobat fins a 12 esqueletas d’elefants mòrts sus cada 100 animals vius —un nivèl totalament insostenable—, çò que fa pensar a un rapid declin de la populacion d’elefants africans. E tot aquò dempuèi 2007, una annada ont fasiá mai de 12 ans que la populacion d’elefants creissiá. Ara, en un esfòrç per ajudar a la lucha contra lo braconatge dels elefants, los Estats Units an confirmat l’enebicion totala del comèrci d’evòri d’elefant african.
 
 
Resultat piéger de çò qu’òm esperava
 
Los resultats son piègers de çò qu’esperavan los scientifics. “Sabiam que la situacion èra marrida, mas pensàvem pas qu’èra aital. Aquò es fòrça pus marrit encara. S’arrestam pas ara lo braconatge, la populacion d’elefants africans se poirà pas mai recuperar naturalament”, ” çò diguèt David Banks, director del programa d’Environament Natural per Africa.
 
En mai d’aquò, los scientifics an assolidat qu’ara i a d’elefants que viatjan pendent la nuèch e s’amagan pendent lo jorn pr’amor qu’an paur dels umans. “N'i a pro per s’inquietar”, çò confirmèt Cristian Samper, de la Societat per la Conservacion Environamentala. “Las solucions ja son conegudas dempuèi longtemps e cal agir ara: mai d’argent per la polícia environamentala e barrar totalament los mercats al comèrci d’evòri abans que siá tròp tard”.
 
 
 
 
Christian Andreu