Dins l’encastre de sa fèsta nacionala, Catalonha manifestèt ièr per dire al Mond que son prèstes per l’independéncia. Per aquela rason, mai d’un milion de personas participèt a cinc manifestacions simultanèas a Salt, Berga, Tarragona, Lhèida e Barcelona, en revendicant l’independéncia e en disent que son “un país viu, en movement, organizat e prèst per venir un nòu estat”. Barcelona aculhiguèt la manifestacion mai multitudinària mas tanben las autras quatre son las pus grandas que se son jamai vistas.
 
A 17h14, las campanas de la catedrala vielha de Lhèida sonèron per marcar lo començament d’un baticòr que los manifestants an representat en levant de ponches de carton jaunes, sincronizats dins las cinc vilas que manifestavan. Puèi lo president de l’Assemblada Nacionala Catalana, Jordi Sànchez, demandèt a las institucions que “trantalhèsson pas per plaçar las urnas” per lo referendum sus l’independéncia de Catalonha e Aran. Per Sànchez, lo vòte es “lo lengatge que l’encastre democratic compren, lo melhor omenatge als pòbles liures del Mond, e lo melhor esplech per téner aqueste país coma un sol pòble”, perque “totes acceptaràn la resulta d’un referendum per l'independéncia”.
 
Lo president de Catalonha, Carles Puigdemont, manifestèt a Salt, qu’es près de Girona. D’elegits de totes los partits, levat los espanholistas, participèron tanben a las protèstas. Es tanben lo primièr còp que l’èx-president Artur Mas participa a una manifestacion independentista: “N’aviái fòrça enveja”, çò declarèt Mas, que dins las annadas precedentas preferiguèt participar pas per servar son ròtle institucional de president.
 
La quantitat de manifestants foguèt enòrma. La polícia comptèt 540 000 participants a la manifestacion de Barcelona del temps que l’ANC e Òmnium an calculat 120 000 manifestants a Lhèida. A Salt, Berga e Tarragona la polícia comptèt 135 000, 60 000 e 110 000 personas respectivament. L’organizacion calcula un milion de manifestants del temps que la polícia ne compta 800 000 e que la delegacion del govèrn espanhòl en Catalonha e Aran assegura que solament an passat per carrièras 370 000 personas. Pr’aquò, ongan los mèdias espanhòls si qu’an reconegut una protèsta massissa e multitudinària.
 
 
L’independéncia dins un an
 
Lo president Puigdemont diguèt dins una conferéncia de premsa abans la manifestacion que la fèsta nacionala de l’an que ven el serà ja “president interimari se se fan plan las causas”. Segon lo president, aquel jorn lo país se trobarà dins la “transicion entre la pòstautonomia e la preïndependéncia”. A la fin de julhet de 2017 lo Parlament aurà acabat lo prètzfach dins lo qual s’es engatjada la majoritat de deputats independentistas per que tot siá prèst per l’independéncia. Dins aquel sens, Puigdemont anonciarà las eleccions constituentas del govèrn del nòu estat independent de Catalonha e Aran per la rintrada de 2017.
 
Pasmens, Puigdemont ensajarà un darrièr còp de demandar un referendum independentista a l’estat espanhòl lo 28 de setembre que ven, e mai se los representants de l’estat o an refusat reïteradament. Se tornan refusar, lo programa previst es l’eleccion constituenta del nòu país independent a la rintrada de 2017.
 
 





Discursos diadapor vilawebtv
 
 

---

Mai d’informacions sus Vilaweb e sus Television de Catalonha.