“La menaça es maximala”, çò diguèt lo primièr ministre francés, Manuel Valls, dins una entrevista al programa Grand rendez-vous d’Europe 1 en partenariat amb iTELE e Les Echos. “Totes los jorns, los servicis d’informacions, la polícia, la gendarmariá, totes los jorns, desjògan d’atemptats, desmantèlan de filièras iraquosirianas”, çò expliquèt en insistissent sul fach que França es “una tòca” dels terroristas.
 
“Aquesta setmana, almens dos atemptats son estats desjogats”, sens donar mai de precisions suls faches que s'i refererissiá, e mai s’òm pòt pensar que parlava de l’arrestacion de plusors personas dont tres femnas, après aver trobat una veitura amb divèrsas botelhas de gas a l’entorn de la catedrala de París. Segon las autoritats, las femnas avián l’intencion de far un atemptat dins una gara de la capitala francesa, en seguissent d’instruccions de l’autoproclamat Estat Islamic.
 
Segon Valls, i a 700 ciutadans de l’estat francés que combaton en Iraq e en Siria amb los jihadistas, dont “275 femnas e qualques desenats de menors”. En mai d’aquò, 196 jihadistas son mòrts dins aqueles territòris.
 
“Avèm sus nòstre territòri 1350 personas amiradas per d’enquèstas que son uèi en preson, 293 en ligam dirècte amb de filièras terroristas”, çò diguèt en precisant : “Se pòt considerar —compreni lo pes de las chifras— que i a aperaquí 15 000 personas que son seguidas perque son dins un procès de radicalizacion”.
 
 
“Sarkozy s’engana”
 
D’un autre costat, Valls critiquèt l’èx-president e candidat a la presidéncia, Nicolas Sarkozy, perque prepausa la detencion administrativa dels “individús perilhoses suspèctes de ligams amb lo terrorisme”, coma mesura de precaucion. Per Valls, Sarkozy “s’engana en fasent creire als franceses, e de manièra terribla, qu’amb el, al fons, i auriá pas pus d’atemptats”.
 
“S’engana Nicolas Sarkozy, s’enganèt en 2012 sus la lectura de la menaça terrorista, quand a l’epòca aguèt agut evocat los crimes de Mohamed Merah coma aqueles d’un lop solitari”, çò precisèt Valls. E apondèt que “s’enganèt coma president de la Republica sus l’estenduda de la menaça pr’amor qu’afebliguèt la nòstra seguretat e la nòstra defensa en fasent baissar los investiments, los mejans en òmes, en femnas, dins las nòstras fòrças de seguretat interioras e exterioras [...] s’engana sul metòde en ensajant de tòrcer lo còl a l’estat de drech”.
 
Dins aquel sens Valls qualifiquèt Sarkozy de “brutal” e de “divisor”. “Far creire als nòstres compatriòtas [vòl dire conciutadans] qu’òm poiriá reglar aqueles problèmas aisidament, es mentir”, çò ajustèt.
 
 
 
 

Le Grand Rendez-Vous (partie 1) du 11/09/2016por ITELE