Se declarèt un incident quimic, ièr dimècres, a la centrala nucleara de Fessenheim, en Alsàcia, fasent dos ferits leugièrs. Segon l’Agéncia de Seguretat Nucleara (ASN), foguèt una “pèrda de vapor d’aiga” e non un incendi coma s’èra dich al començament.

Una pèrda de vapor d’aiga —e non pas un incendi com s’èra dich al començament— se produsiguèt ièr de tantòst a la centrala nucleara de Fessenheim (Alsàcia), al cors d’una operacion de mantenença sul reactor numèro 1 de la centrala, çò declarèt a Reuters una pòrtavotz d’EDF.
 
“Cap d’incedi a pas començat. I a agut, en una operacion de mantenença, de vapor d’aiga que s’es perduda”, çò apondèt, en dire que doas personas èran leugièrament cremadas a las mans. Son totas las informacions que l’Autoritat de Seguretat Nucleara (ASN) a balhadas ara per ara.
 
En abril, un incendi se debanèt dins una sala de las maquinas d’aquela centrala, dins la part non nucleara, sens far de ferits.
 
La centrala de Fessenheim, la mai anciana del pargue nuclear de l’Estat francés, se deu barrar abans 2017, segon una promessa que François Hollande a facha als ecologistas al moment de la campanha de las eleccions presidencialas.
 
Installada sus las ribas de Ren, compren dos reactors de 900 megawatts meses en servici en 1977.
 
En seguida d’aquel incident, François de Rugy, copresident del grop Euròpa Ecologia-Los Verds (EELV), declarèt que cal “accelerar la barradura” de la centrala.
 
“Fessenheim es la centrala que lo president de la Republica s’èra engatjat de n’assegurar la barradura e lo començament del desmantelament pendent aqueste mandat”, çò diguèt sus BFM TV.
 
Soslinhèt que los ecologistas reclamavan un “calendièr precís” de las fasas de barradura, amb d’audits del pargue nuclear francés mai transparents.
 
“Demandam que i aja una comission d’enquèsta parlamentària perque es la garentida que totes los vejaires seràn representats”, çò apondèt.
 
Cap a 15h11, l’accion EDF perdiá 0,71% en borsa.