An detengut en Alemanha tres sirians que segon las autoritats serián estats enviats coma de cellulas terroristas dormentas, en tot esperar un bon moment per far un atemptat. De mai, los tres sirians arrestats serián intrats en Alemanha en 2015 amb d’autres immigrants. Son estats detenguts per èsser restacats directament amb los atemptats de l’an passat a París.
 
Lo ministre de l’Interior alemand, Thomas de Maizière, a assegurat que los passapòrts dels tres detenguts serián parièrs als dels terroristas que participèron als atacs de París de novembre de 2015. En mai d’aquò, los tres suspèctes serián intrats al país de la meteissa manièra, valent a dire en tot demandar l’asil politic, çò qu’aurián tanben fach los terroristas de París. “Poiriá ben èsser una cellula dormenta”, çò diguèt de Maizière.
 
La justicia alemanda crei per tant que los tres detenguts serián arribats en Alemanha per planificar d’atacs terroristas, e qu’aurián una relacion directa amb l’autoproclamat Estat Islamic. Benlèu serián a esperar d'òrdres de l’organizacion jihadista. Segon lo ministèri public alemand, i a pro d’indicis per sospechar los tres detenguts coma de membres d’una organizacion terrorista estrangièra. E tot aquò après qu’en julhet passat dos òmes qu’èran intrats en Alemanha coma immigrants aguèsson provocats dos atemptats en Bavièra, en causant de desenats de ferits. Los dos atacs semblavan inspirats o restacats amb l’Estat Islamic, segon çò que confirmèron las autoritats alemandas.
 
Segon las leis alemandas, los tres detenguts  pòdon èsser identificats solament per lor prenom e las darrièras inicialas del nom d'ostal. Serián intrats en Alemanha après aver traversat Turquia e Grècia, e serián demorats dins la vila alemanda d’Amborg, çò rapòrtan los jornals alemands. En octòbre passat, aurián demandat a un cap d’operacions de l’Estat Islamic de viatjar en Euròpa per los ajudar a planificar d’atacs o per recebre de nòvas instruccions, çò diguèron los procuraires del ministèri public alemand.
 
 
 
 
Christian Andreu