Lo Partit Nacionalista Basco (PNV-EAJ) poiriá non ganhar pas las eleccions bascas del 25 de setembre que ven, se se confirma los darrièrs resultats d’un sondatge que l'a publicat lo Gabinet de Prospeccion Sociologica del govèrn basco aquesta meteissa setmana e que l’a raportat lo jornal Vilaweb. Segon aquel sondatge, los nacionalistas bascos del PNV-EAJ e la formacion d’esquerra independentista EH Bildu demorarián a la primièra posicion e plan luènh dels autres partits politics, coma los socialistas o lo PP, que perdrián fòrça vòtes.
 
Lo sondatge confirmariá doncas un resultat electoral plan semblable a un autre publicat tanben per lo Centre de Recèrcas Sociologicas (CIS) espanhòl ont Elkarrekin-Podèm intra amb fòrça al Parlament basco mas sens ganhar las eleccions, e ont los socialistas bascos perdrián fòrça sètis dins la cambra basca (passarián de 16 a 9).
 
Aital, lo PNV-EAJ auriá 26 sètis parlamentaris (ne perdriá un) e los independentistas bascos d’Arnaldo Otegi —que se pòt pas presentar pr’amor qu'o li an enebit los jutges espanhòls— arribarián a 17 sètis. Pr’aquò, per aténher la majoritat absoluda en aquela eleccion cal 38 deputats, e per tant lo PNV-EAJ poiriá pas formar de govèrn tot sol, pas manco amb l’ajuda dels socialistas.
 
L’alternativa poirià èsser un govèrn d’EH Bildu e Elkarrekin-Podèm, qu’atenheriá pas tanpauc la majoritat absoluda. E s'es possible que lo PP s'addicione a una coalicion del PNB e dels socialistas, es malaisit d’o pensar pr’amor que seriá un suicidi politic dels nacionalistas bascos. Per aquela rason, lo govèrn basco poiriá intrar tanben dins una paralisi politica coma la que patís a l’ora d’ara lo govèrn de Madrid. E la crisi politica espanhòla poiriá venir encara pus granda.
 
Ara, una causa es clara. Lo partit independentista basco EH Bildu contunha d’aver los vòtes de fòrça bascos. Aquò contraditz d'a fons las declaracions espanhòlas que predison una pèrda reala de vòtes d’aquela formacion devèrs Elkarrekin-Podèm. E segon aqueles dos sondatges seriá aital. E mai s’Arnaldo Otegi se pòt pas presentar a las eleccions bascas, segon aquel sondatge es verai qu’Euskal Herria intrarà tanben dins una granda crisi politica davant l’impossibilitat de poder formar un govèrn per manca de majoritat. E aquò tanben ajudariá los independentistas catalans dins lor camin devèrs la independéncia.
 
 
 
 
Christian andreu