La societat cooperativa Vistedit, que publica dempuèi 1995 lo setmanièr La Setmana e las publicacions infantilas Papagai e Plumalhon es totjorn menaçada. La campanha de sostens lançada en octòbre d’arunan a capitat de trapar 120 abonats de mai (gaireben 800 en tot), mas es pas pro per salvar La Setmana, la societat cooperativa e los quatre emplecs associats. Per tant, dissabte que ven se tendrà a Lescar (Bearn) una serada de sosten al mèdia occitanofòn. Una participacion nombrosa es desirabla, mas tanben una avalanca de sostens e d’abonaments per tal d’assegurar los mèdias de qualitat en occitan.

Dissabte que ven, lo complèxe Victor Hugo de Lescar (Bearn) aculhirà una serada de sosten al setmanièr occitanofòn La Setmana e en general a la societat cooperativa Vistedit, qu’en mai del setmanièr publica las revistas infantilas Plumalhon e Papagai e qu’emplega quatre personas.
 
Coorganizat per la Federacion Interregionala dels Mèdias Occitans (FIMÒC), l’eveniment prepausa tre 19h de cantar, dançar, escotar, manjar. Lo programa prepausa un aperitiu cantèra e los espectacles de tres grops: Los Seuvetons es un grop bearnés que sona dempuèi las annadas 1980 e que prepausa un espectacle novèl nomenat Arcolin, lo parelh Base Duo Didier Oliver e Joaquim Montbord que fan de musica gascona e d’endacòm mai, e Espartenhas, un qüatuor de musicas vengudas de Gasconha, Portugal, Itàlia…
 
Al programa :
   
Tarifas :
   
Prèses reduches :
  Per mai d’informacions: gestion@lasetmana..., Telefòn +33(0)5 59 81 02 59 (HB) o +33(0)6 83 98 40 26.
 
 
Tota la premsa occitana patís
 
Sul Blòg occitan de France 3, un article de Benaset Roux anóncia la serada de sosten a La Setmana. Roux remembra las dificultats que patissèm los mèdias occitanofòns en general.
 
Dins aquel article, Roux parla amb lo capredactor de La Setmana, Clamenç Pech qu’explica que la publicacion tòca pas cap de subvencions de las collectivitats e “aquò es pas d’actualitat”. Aquí, Pech explica que lo sit internet prepausarà lèu una formula novèla, abans la fin de l’an. “Lo numeric nos servís de teaser per l’edicion papièr qu’es pas condemnada. Entre los dos i a una mena de coabitacion pacifica! Sèm a estudiar de publicitats pagantas sul sit”. Mas aquò sufirà pas per èsser en capacitat de contunhar.