Lo govèrn dels Estats Units a pensat ara a un plan per donar d’armas dirèctament als curds de Rojava que luchan contra l’autoproclamat Estat Islamic. Mas aquò poiriá provocar encara mai de problèmas entre lo govèrn de Turquia e l’administracion Obama. Aquel plan seriá estat discutit al Conselh de Seguretat Nacional dels Estats Units e solament auriá de besonh de l’aprobacion finala d’Obama.
 
Mas donar d’armas als curds sirians es una decision malaisida pr’amor qu’ara Barack Obama li caldrà navigar entre los interèsses del Mond occidental, d’un costat, e los de Turquia, de l’autre. E mai, donar d’armas als curds seriá una solucion fòrça practica segon l’estat major estatsunidenc, perque los curds son l’enemic mai fòrt de l’Estat Islamic, ara, e que poirián fòrça ajudar a la conquista de la vila de Raqqa, qu’a l’ora d’ara es contrarotlada pels jihadistas.
 
Ça que la, lo plan qu’es estat filtrat dins la premsa occidentala donarà pas l’escasença als curds de recebre d’armas pesantas coma de canons o d’autras armas antitancs. Solament d’armas leugièras. E l’Ostal Blanc a pas volgut far cap de declaracion. Tot aquò après que l’armada estatsunidenca a de sospièchas que poiriàn èsser los darrièrs a arribar dins la vila de Raqqa, un còp que Turquia es intrada dins la guèrra de Siria, un fach que Jornalet aviá ja raportat.
 
Aital, los comandants de l’armada estatsunidenca an ensajat de donar de consèlhs a Barack Obama sus la situacion actuala de Siria:”La guèrra es la guèrra, e la politica es una causa desparièra. L’Estat Islamic es una vertadièra menaça per la civilizacion occidentala. E mai, los Estats Units deurián donar d’armas pesantas als curds mentre que Turquia es una dictatura que sosten lo terrorisme islamic. Los curds son los aliats mai fidèls…”
 
 
Pèrda del contraròtle del temps
 
Aital, divèrses analistas militars estatsunidencs aurián reconegut en privat que los interèsses dels Estats Units son a mand de pèrdre lo contraròtle del temps dins la guèrra de Siria a causa de la guèrra dobèrta que i a ara entre turcs e curds. Cal pas desmembar que lo vertadièr enemic es l’autoproclamat Estat Islamic e que cal contunhar la lucha contra los terroristas jihadistas, çò dison los analistas nòrd-americans.
 
Fins a l’ora d’ara, las armas que los Estats Units an donadas als curds lor son arribadas indirèctament. Volián pas destorbar los turcs. Mas ara la situacion guerrièra dins la region es fòrça desparièra e per aquela rason l’administracion Obama a lo plan de las donar dirèctament, per poder ganhar de temps. E mai s’aquò destorbava Turquia.
 
“S’aquò èra vertat, i poiriá aver de problèmas serioses entre Turquia e los estatsunidencs”, çò diguèt Soner Cagaptay, expèrt en Turquia . “Aquò poiriá èsser una polida escasença pels curds per conquistar mai de territòri e aquò es una causa que los turcs vòlon pas de cap de biais”, çò apondèt. Doncas, la situacion en aquela region es totjorn mai que delicada.
 
 
 
 
Christian Andreu