Tornarmai una tragèdia en Mediterranèa. Un batèl amb aperaquí 600 migrants e refugiats de divèrsas originas naufraguèt ièr a 12 Km davant la còsta d’Egipte. 42 personas mòrtas es la chifra oficiala que nos es arribada a la redaccion al moment d’escriure aqueste papièr, mas poiriá fòrça aumentar car, per ara, aperaquí 160 personas son estadas socorregudas del temps que i auriá quatre centenats de personas desaparegudas.
 
La causa mai probabla de la tragèdia es que lo vaissèl èra subrecargat. Segon lo testimoniatge dels subrevivents, lo batèl èra precari, bolegava tròp e portava lo doble de personas de çò qu’es permés. Tanlèu arribat en nauta mar, lo capitani decidiguèt d'arrestar lo viatge e de tornar, mas aquò èra tròp tard.
 
Fòra de l'espital, de parents dels mòrts e dels desapareguts mostravan lors dolor e indignacion. Se las autoritats aguèsson reagit a temps, degun seriá pas mòrt, çò dison.
 
Mentretant, la polícia egipciana detenguèt un vintenat de subrevivents acusats de temptativa mancada de migracion illegala.
 
 
La Mediterranèa centrala es tornarmai la via principala
 
Amb lo barrament de la rota dels Balcans en març passat, la perilhosa rota de la Mediterranèa centrala es tornada venir la principala via d’accès dels migrants e dels refugiats en Euròpa. La majoritat dels batèls partisson de Libia devèrs Itàlia (Lampedosa o Sicília). Pasmens, Tunisia e Egipte son tanben de pòrts de sortida d’aquela rota.
 
Lo cap de l’Agéncia Europèa de Proteccion de las Frontièras (Frontèx), Fabrice Leggeri, afirmèt l’estiu passat qu’”Egipte es a venir un país de sortida”. En mai d’aquò, segon Leggeri, “lo nombre de batèls sortits d’aquel país a despassat lo milièr en 2016”.
 
Dempuèi l’an 2014, mai de 10 000 personas son mòrtas en ensajant de traversar la Mediterranèa, segon de donadas de l’ÒNU.