Una còla internacionala de 400 scientifics an capitat de descriure la mapa del genòma uman. La descobèrta principala d’aquela recèrca es qu’aquel 98,5% de l’ADN qu’òm pensava que valiá pas per res es util e plan trascendent dins lo genòma.
L’estudi revèla que lo genòma es coma un enòrme tablèu de contraròtle amb de milions d’interruptors que regulan l’activitat dels gèns. Aqueles interruptors, que se cresiá fins ara qu’avián pas cap de ròtle, son los responsables del foncionament dels gèns, e sens eles las mutacions dins las regions que contraròtla cada interruptor generarián de malautiás.
La recèrca dobrís de nòus camins per la recèrca biomedicala. Amb aquela referéncia, se poirà localizar d’airals fòrça concrets del genòma que permetràn d’avançar en l’estudi de las malautiás. Los cercaires, amassats dins lo consòrci public dels Estats Units Encode, son arribats a la conclusion qu’80% del genòma a qualque foncion, coma per exemple aquela que contraròtla cossí e quora se produsisson las proteïnas.
Los resultats foguèron publicats dins trenta articles, dijòus passat, dins tres revistas scientificas.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Aqueste article ne ditz tròp o pas pro. Lo contraròtle genetic dels cicles cellulars en terme de produccion proteïca, ieu, l'estudièri ja fa mai de vint ans en universitat de sciéncias, a Tolosa. I deu aver plan segur quicòm de nòu, e quicòm de plan preciós. Quicòm que deu portar fòrça profièits financièrs a las industrias farmaceuticas e medicalas — se que non, i auriá pas agut cap recèrca… en mitan liberal american, la recèrca es una puta que se dona sonque se i a moneda de ganhar.
I a qucòm mai que m'interpèla fòrça dins aquesta bilheta redaccionala. I es dit "Aqueles interruptors, que se cresiá fins ara qu’avián pas cap de ròtle…". Los scientifics, metodicament, se pòdon pas permetre de confondre "creire" e "saber". Coma per çò que ne vira de la "matèira negra" e de "l'energia negra" en astrofisica, disián que "sabián pas la foncion de 98,5% de genòma", çò qu'es plan diferent que de "creire que servissián pas a res 98,5% del genòma". Matèria e energia negras, la "sabon pas observar" e doncs, a títol d'ipotèsi, las "supausan" e las "cercan" . Un scientific onèste sap o sap pas. Subre unes punts, plan segur, coma totòm, crei o crei pas. Mas alavètz, çò que "crei o crei pas" a pas res per res de scientific e l'objècte de sa cresença o de son incresença es cap e tot en defòra de las consideracions scientificas.
Dins los mitans literaris, occitans o d'endacòmai, aquesta confusion entre "creire" e "saber" a, de còp en còp, ridiculizat de grands pensaires e creators occitans, treslusissents pr'aquò, endacòm mai.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari