La ròca pus anciana de la planeta auriá 4020 milions d’ans, segon un grop de scientifics de l’Universitat d’Albèrta (Canadà). Per l’autor principal del trabalh, lo cercaire Jesse Reimink, la descobèrta balha d’informacions importantas sus la manièra dont se formèron los primièrs continents. Segon l’estudi, publicat dins la revista Nature Geoscience, la Tèrra primitiva èra cobèrta d'una superfícia similara a la crosta oceanica.
 
“Avèm plan pauques ponches de donadas per poder avalorar çò que se passava sus la Tèrra en aquel moment”, çò ditz Reimink. De fach, dins lo Mond i a solament tres endreches amb de ròcas o de minerals de mai de 4 miliards d’ans: l’un al nòrd de Quebèc, un autre de grands minerals en Austràlia occidentala e la formacion rocalhosa dels Territòris del Nòrd-Oèst de Canadà examinats en aquel estudi.
 
Es plan conegut que las ròcas pus ancianas se formèron fa mai de 4 miliards d’ans. Ara, la particularitat de la ròca estudiada per Reimink es la preséncia de granas de zircon ben conservadas. Lo zircon es un mineral que permet de verificar sens cap de dobte la data que se formèt. Aquela ròca la trobèt lo supervisor de la tèsi doctorala de Reimink, Tom Chacko, pendent un trabalh de terren dins un airal qu'es a aperaquí 300 quilomètres al nòrd de Yellowknife.