Los païsans de Roergue an fach lor denóncia contra Lactalis, l'FNSEA e l’estat francés per panatòri en reünion, en tot considerar que tant la societat lachièra coma la federacion estatala de sindicats agricòlas e tanben l’estat son los responsables de la crisi qu’a l’ora d’ara estrementís lo mond agricòla après la fin de las quòtas lachièras. Dijòus passat, tres pòrtavoses de la Confederacion Païsana del departament d’Avairon foguèron entenduts als locals del comissariat de Rodés. Lo procuraire de la Republica de Rodés donèt seguida a l’afar e demandèt una instruccion.
 
Se repròcha a Lactalis de pagar pas pro sos productors: “Acabarem l’an 2016 a 275 èuros la tona, del temps qu’estimam que caldriá que foguèsse pagada a 400 èuros per assegurar una remuneracion al noiriguièr”, çò declarèt a La Depêche un dels pòrtavoses païsans. En mai d’aquò considèran que l'FNSEA es coresponsabla d’aquela situacion perque “fa partida del Copa-Cogeca, lo sindicat europèu qu'a obrat per la fin de las quòtas lachièras”. E l’estat francés l’acusan perque “refusa de legiferir suls prèses minimals pels agricultors.
 
Aquela denóncia seguís l’accion dels païsans roergasses que la faguèron en mai passat en çò de Lactalis per protestar contra lo panatòri industrial del lach. Es en aquel moment que los pòrtavoses del sindicat agricòla Francis Sabrié, Laurent Reversat e Francis Enjalbert decidiguèron d'entreprene aquela accion en justícia en considerant que tant la societat lachièra coma la federacion estatala de sindicats agricòlas e tanben l’estat francés son los responsables de la crisi.
 
A l’ora d’ara, d’agricultors de la Confederacion Païsana del Bas Lengadòc tanben faràn lor denóncia contra las cooperativas viticòlas qu’estiman colpablas d’extorsion.