Coma cada an, l’associacion Los Companhs de Paratge organiza una jornada de rescontres dobèrta a totes sus un tèma vist de mai d’un angle. Aqueste dissabte 1r d’octòbre, a Bisan de Menerbés, de matin e de vèspre se parlarà a l’entorn d’“Imaginaris e realitats de l’aiga”.
 
 
Cinc agaches sus l’aiga
 
Lo director del CIRDÒC, Benjamin Assié, elegit a la comuna, dobrirà lo talh en abordant los rapòrts de Bisan amb son riu, Cesse. Seguirà lo Danièl Loddo que, fòrt de totes sos collectatges e enquistas, parlarà del legendari de l’aiga. Aprèp lo dinnar (preparat per l’associacion La Formiga), Felip Calàs, grand coneisseire de l’òbra de Riquet, contarà cossí trapèt la solucion per emplenar d’aiga son canal; Brunò Peiràs mesclarà son agach de poèta occitan e sas coneissenças sus l’aiga d’aicí e d’endacòm mai per abordar la question al present e las interrogacions per deman. Miquèla Stenta posarà dins los vèrses de Frederic Mistral e del Poèma de Ròse la matèria a son intervencion.
 
 
Sesilha de contes
 
Per clavar la jornada, lo Florent Mercadièr dirà sos Contes entre doas aigas per seguir Garona de Pirenèus a la Mar Granda (espectacle tot-public, a comptar de 9 ans).
 
 
Informacions practicas
 
L’essencial de las intervencions serà représ en linha sul site de l’associacion, ont traparetz la bilheta d’inscripcion per la jornada de dissabte, que benefícia del sosten de la comuna de Bisan, del Conselh Departamental d’Aude e de l’estructura ADREUC.
 
La jornada es a gratis, participacion liura per la sesilha-contes; dinnar a 15 èuros (possibilitat de manjar vegetarian. Se marcar: +33(0)4 68 25 19 78 o ostal.sirventes@wana...)
 
 
“1216, Bèucaire” en novembre
 
Lo 17 de novembre, l’associacion intervendrà a Sant Ilari sus “1216 e lo sèti de Bèucaire: la debuta de la reconquista occitana” amb un expausat de Joan-Loís Gasc e la lectura en occitan medieval, occitan contemporanèu e francés dels tròces de La cançon de la Crosada en rapòrt amb l’eveniment.
 
 
 
Alan Roch