Lo reactor numèro 2 de la centrala nucleara de Golfuèg (Sèrras d’Agenés) s’arrestèt diluns passat a l’entorn de 14h09. En seguida, EDF disiá dins un comunicat que lo reactor “s’es arrestat automaticament confòrmament als dispositius de seguretat e de proteccion del reactor”. Se raportèt pas la causa de la pana mas se diguèt que se trabalhava “per precisar las circonstàncias d’aquel arrèst e per remetre l’unitat de produccion en servici en tota seguretat”, en tot ajustar que “los poders publics, l’Autoritat de seguretat nucleara, la Comission Locala d’Informacions e las comunas de proximitat son estadas informadas d’aquel eveniment”.
 
“Las nòstras còlas son a cercar las causas d’aquel arrèst automatic qu’a pas cap d’incidéncia sus la seguretat del reactor”, çò declarèt a l’AFP Aymery Saint-Loup, engenhaire d'astrencha a la comunicacion de la centrala, que precisèt que lo reactor 1 fonciona normalament e contribuís a l’alimentacion del ret electric.
 
 
Una pèrda radioactiva en 2010
 
En decembre de 2012 la cort d’apelacion de Tolosa condamnèt EDF a 4000 èuros d’emenda per una pèrda d’aiga radioactiva a la centrala de Golfuèg. Aquela condemnacion seguissiá una pèrda de triti que se debanèt lo 18 de genièr de 2010. Foguèt una pèrda mendre, qu’aguèt un impacte feble sus la santat, segon l’Autoritat de la Seguretat Nucleara (ASN).