Li dison Abrahim Hassan, es d’origina jordana e nasquèt fa cinc meses. Serà conegut per èsser lo primièr enfant de l’istòria engendrat amb una tecnica de procreacion medicalament assistida qu'utiliza l’ADN de tres personas diferentas. La revista New Scientist ven de publicar oficialament l’eveniment.
 
Aquela tecnica, patentada a Newcastle (Anglatèrra), es fruch del trabalh del cercaire John Zhang e de sa còla del New Hope Fertility Center de Nòva York (Estats Units). La tòca es d’evitar la transmission de malautiás ereditàrias restacadas a las mitocondrias, çò es de compausants cellulars que s’eiretan de la maire mas que definisson pas l’aparéncia fisica de l’enfant. Alavetz, amb aquela tecnica, Abrahim Hassan poirà retraire a sa maire mas en tot nàisser liure d’una malautiá genetica que sa maire portava dins sos gèns. Aquò s’es fach possible gràcias a l’emplec de l’ADN d’una tresena persona per la reproduccion genetica.