Actualitats
L’estat tutelarà Marselha amb mai de policièrs, una ZSP e l’estatut de metropòli
Jean-Marc Ayrault prepausa un plan global d’accion per la Ciutat Focèa
Après un comitat interministerial, lo primièr ministre francés a anonciat las mesuras que va prene lo govèrn per “luchar contra l’inseguretat e la criminalitat a Marselha”.
Lo primièr ministre francés, Jean-Marc Ayrault, anoncièt dijòus una “estrategia globala” per far de Marselha una metropòli de dimension europèa, escafar la “violéncia endemica” e permetre a l’aglomeracion de progressar.
Al delà de la seguretat, Ayrault, que serà a Marselha diluns e dimars, prevei un redelegament institucional per dotar la Ciutat Focèa de l’estatut de metropòli, e un prefècte serà dedicat a aquela mission.
Lo destin de Marselha es una “question d’interès nacional” [estatal], çò diguèt Jean-Marc Ayrault en se defendent de voler estigmatizar los actors locals o de tutelar la vila.
Fàcia a l’inseguretat, a anonciat un “refortiment de 205 policièrs e gendarmas a Marselha” e la creacion d’una nòva zòna de seguretat prioritària (ZSP) pels quartièrs del sud de la vila.
L’actual prefècte delegat a la seguretat vendrà un prefècte “de plen exercici” per tot lo departament de las Bocas de Ròse, e pas pus solament per Marselha, e los mejans de la justícia e de l’administracion penitenciària seràn refortits.
“Per capitar, porgissèm la man e desiram que siá presa”, çò diguèt lo primièr ministre francés, que veniá de se reünir amb 18 ministres e los lors representants.
Per Ayrault, que Marselha venga capitala europèa de la cultura, en 2013, es “benlèu una oportunitat formidabla” per mobilizar totas las energias.
Lo sindicat de polícia Unité SGP Police insistís sul fach que Marselha “es pas una zòna de non-drech ni un Fòrt Chabròl permanent” car la pojada de la violéncia e los reglaments de comptes dins la Ciutat Focèa son sustot ligats al trafec d’estupefasents e, per tant, l’idèa d’un plan global va dins lo bon sens.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#4 E òc, Oton d'Aniòrt, un ministèri de LA cultura. E tu, sabes comptar ? Cresi plan que n'i plan mai d'una, non ? E qué farà, aqueste ministèri, de gaireben tres milenaris de cultura foceana ? De la cultura occitana e de las que la venguèron de segle en segle enriquir fins ara ?
#1 Car Joan-Enric Fabre, me sembla totun que lo ministèri de la cultura es implicat dins lo projècte dels "Socialistas" (sic).
Multiplicar tricas e flingues i cambiarà pas res. Metre jos tutela ciutats umiliadas coma s'èran pas capablas de se gerir elas meteissas, implicar mantes ministèris neoliberals (signataris de pactes d'estabilitat europèus) establits endacòm mai (en França, al nòrt de Leire) per tornar civilizar ciutats a la deriva dins lo laberint neoliberal, quora sabèm qu'es la CIA qu'implantèt a Marselha totas las màfias de la "French connection", en escambi de l'ajuda fisica de sos gròsses braces per espetar los movements obrièrs de contestacion anticapitalisa al temps del Front Popular, a ieu, me descòra de veire un paternalisme francés de tant marrida fe manejar una de las ciutats mai anticas del domani geografic de l'estat francés coma se foguèsse pas qu'una enfantona inocenta qu'irresponsabla.
La misèria subraguda, dins un mode que nos condiciona totei a creire que lo benastre, aqu'ò's "aver", misèria d'aicí e misèria de pertot que fa venir aicí, la misèria (materiala puèi culturala) es a la fònt de totei lei trevanças socialas de Marsilha e dòu mond modèrne.
Luchar contra los trafecs de tota mena es luchar contra la misèria e l'incultura, en tot se remembrar fòrt e mòrt que la cutura de Marselha es plan mai que francesa sonque… Qué voldriá dire "cultivar qualqu'un" en tot lo copar de sa cultura, e mai que mai a çò sieu ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari