Dimenge passat, 52 personas moriguèron après la repression policièra d’una manifestacion en Etiopia. De milièrs de personas s’èran rassembladas dins un festenal d’accion de gràcia, a Bishoftu, a aperaquí 40 Km al sud d’Addis Abeba. “Nos cal de libertat e de justícia”, çò cridavan del temps que qualques manifestants brandavan lo drapèl roge, verd e jaune del Front de Liberacion Oromo. En seguida la polícia lancèt de gases lacrimogèns e tirèt en l’aire de balas realas, çò que provoquèt la desbranda de la molonada amb un bilanç tragic. Qualques unes tombèron dins un valat prigond.
 
Lo govèrn acusa los grops rebèls e dissidents d’incitar a las protèstas e de provocar la violéncia.
 
Dins las darrièras annadas an esclatat de nombrosas protèstas e manifestacions dels oromos contra lo govèrn, amb lo bilanç de desenats de manifestants mòrts.


Qual son los oromos?
 
En Etiopia i a 25 milions d’oromos. Parlan una lenga coshitica, l'oromo. A causa de lor cultura diferenta, son estats discriminats pels successius govèrns etiopians, dempuèi la dictatura de Selassie fins a la Republica Democratica d’Etiopia actuala.
 
Durant una granda partida del sègle XX la lenga oromo foguèt marginalizada e enebida dins las escòlas. Un rapòrt de l'ÒNU, publicat en 2009, senhala qu'entre los ans 2005 e 2008 s'enregistrèt 594 execucions extrajudiciàrias e 43 desaparicions d’oromos. Un autre rapòrt, d’Amnestia Internacionala, declara que, entre los ans 2011 e 2014, almens 5000 oromos foguèron detenguts per s’opausar al govèrn del Front del Pòble etiopian de la Revolucion Democratica (EPRDF), que govèrna despuèi 1991.
 
 
Perqué protèstan?
 
Lo govèrn etiopian anoncièt en abril del 2014 sos plans d’espandir lo territòri de la capitala del país, Addis Abeba, qu'ocupa una partida de la region d’Oromia. Aquela region se situa a l’entorn de la capitala e es lo país de la nacion mai nombrosa del país, los oromos. Dempuèi abril passat i a agut força protèstas que son estadas durament reprimidas e i a agut de centenats de mòrts.
 
Lo govèrn etiopian argumenta que la tòca del plan es de melhorar las oportunitats economicas per las zònas ruralas de l’entorn d’Addis Abeba, mas los oromos o veson pas aital. Eles considèran qu'es un plan d’apropriacion de lors tèrras e cranhon de n’èsser expulsats, car es una tèrra fertila dins un país ont las secadas son abitualas.
 
En abril passat, nòu estudiants moriguèron pendent las protèstas, segon los fonts oficialas, mas qualques testimònis precisan qu’almens quaranta sèt foguèron tuats. En novembre de 2015, las protèstas s'estendèron dins tota la region d’Oromia. En genièr de 2016, Human Rights Watch (HRW) documentèt que 140 manifestants èran estats assassinats per las fòrças de seguretat.
 
Totjorn en genièr passat, lo govèrn etiopian anullèt lo plan d’expansion quand l’Organizacion Democratica del Pòble Oromo (OPDO), que fa partida de la coalicion del lo govèrn, demesiguèt son sosten al regim. Ça que la, la repression contunha e un rapòrt recent del meteis observatòri dels dreches umans rapòrta mai de 200 mòrts e de milièrs de detenguts sens jutjament.