Lo govèrn chilen reconeguèt dimars passat, qu’entre genièr de 2005 e junh de 2016, moriguèron 886 personas que se trobavan jos tutèla de l’estat, en qualque sistèma de proteccion residenciala o medicala del Servici Nacional dels Menors (SENAME). D’aquel naut nombre de mòrts, 649 èran d’enfants o d’adolescents. La directritz generala del SENAME, Solange Huerta, revelèt aquela chifra après que l’alarma foguèt arribada al Parlament del país en seguida de la mòrt d’una filha d’11 ans que demorava dins una residéncia de l’estat e que recebèt pas l’atencion medicala que caliá.
 
Huerta assumiguèt la carga de directritz del SENAME en plena crisi e planguèt qu’aguèsse calgut una enquèsta de dos meses per amassar totas las donadas. Dins lo sistèma de tutèla residenciala, que son de centres del SENAME o d’organismes collaboradors privats, i moriguèron 210 enfants, dont 131 patissián una malautiá. Lo nombre d’enfants e d’adolescents que moriguèron mentre que demoravan amb lors familhas en essent aculhits dins de programas d’organismes privats, es de 406. Dins los centres de la justícia juvenila s'enregistrèt 33 decèsses d’adolescents internats dins un centre del SENAME.
 
Segon las donadas que raportèt Huerta, son mòrts tanben 22 adultes dins de centres d’internament e d’autres 215 dins de centres de proteccion per d’andicapats grèus.
 
Lo Ministèri Public chilen dobriguèt una enquèsta sus la responsabilitat dels foncionaris del SENAME a respècte de la mòrt de la filha d’11 ans, Lisette Villa Poblete. Segon un document emés per la polícia a la demanda dels procuraires, aurián pas agit adeqüatament. En mai d’aquò, una autra enquèsta es a examinar totas las mòrts dempuèi 2005 e perqué foguèron pas denonciadas.