En seguida de l’incident quimic que s’es produsit dimècres a la centrala francesa, la ministra de l’Ecologia, Delphine Batho, diguèt en una entrevista al jornal francés Le Journal Du Dimanche qu’aurà barrat “lo pus lèu possible mas dins lo dialòg social”.

La centrala nucleara de Fessenheim (Alsàcia) serà barrada, coma a promés lo president francés François Hollande, “lo pus lèu possible”, mas “dins lo dialòg social”, çò declarèt la ministra dins aquela entrevista.
                                                                
Segon Batho, l’engatjament d’Hollande per barrar Fessenheim se manten, mas o cal far “dins lo dialòg social, en garentissent lo provesiment energetic de la region e en preservant los emplecs”. Diguèt pas exactament quora se barrarà la centrala mas afirmèt que serà “lo pus lèu possible e lo mai tard en 2017”.
 
“Discutirem sul calendièr precís al moment del debat sus la transicion energetica que començarà en novembre e que s’acabarà abans lo primièr semèstre de 2013. Aquel debat se conclurà per una lei de programacion per la transicion energetica, que la farem votar abans la fin de l’annada 2013”, çò precisèt.
 
Segon la ministra, far passar la part de l’energia nucleara de 75% a 50% es un objectiu “realista”. “Sus l’eolian terrèstre e offshore, sul solar, sus las energias marinas, la biomassa, lo potencial es considerable. E aquò crearà d’emplecs”.
 
Tocant la “conferéncia environamentala” que se debanarà los 14 e 15 de setembre, Delphine Batho afirma que s’agirà pas d’un autre Grenelle. Al contrari, “la conferéncia environamentala serà annala e cada còp se poirà far lo bilanç dels engatjaments preses e metre de nòus afars sus la taula”.
 
Quant al gas de sistre, la ministra se mostrèt desfavorabla a son esplecha perque “al dia de uèi, pausa d’enòrmes problèmas environamentals”.