Tres joves militants del sindicat d’estudiants còrs Ghjuventù Indipendentista venon d’èsser condemnats a de preson ferma. Jutjats dempuèi lo 29 de setembre a la Cort Especiala de París, lo verdicte es d’una “severitat extrèma” segon lo president del Conselh Executiu còrs Gilles Simeoni. An condemnat Niculaiu Battini a 8 ans de preson, Maria Verdi a 6 ans, e Stefanu Tomasini a 5 ans. Los acusan de doas temptativas d’atemptats a Corti contra d’institucions francesas l’8 de febrièr e lo 1r d’abril de 2012.
 
La reaccion en Corsèga arribèt tre que foguèt conegut lo requisitòri de l’Avocata Generala. Dimècres de ser se debanèt de manifestacions de protèsta a Aiacciu, Corti e Bastia. En aquela darrièra vila se descadenèt de susmautas entre la polícia e los manifestants. I aguèt sèt personas feridas.
 
Aquel verdicte arriba après que Corsega aja conegut la manifestacion pus nombrosa de son istòria per lo raprochament e l’amnestia dels presonièrs politics. Aquela manifestacion “demòstra que los presonièrs politics fan partida de la solucion politica d’ensemble per que Corsega s’acamine devèrs un avenir melhor”, çò diguèt alavetz lo president còrs, Gilles Simeoni. E aquel “messatge que l’envia Corsega deu èsser entendut per París”, çò precisava Jean-Christophe Angelini, membre de l’executiu e president de l’Agéncia de Desvolopament Economic de Corsega. Mas sembla que París a pas cap d’intencion de respectar la logica d’amaisament dins la quala Corsega es intrada.
 
Dins aquel sens se mòstra la reaccion de Simeoni al verdicte de la cort de París. “Aquí ont cercàvem d’enrasigar la patz, de condemnacions excessivas semenan las granas de la revòlta e del conflicte. Basta!”, çò a manifestat sus Twitter.
 

Cumunicatu di stampa - Presidente di u Cunsigliu Esecutivu di Corsica pic.twitter.com/uiCfRMQpen

— Gilles Simeoni (@Gilles_Simeoni) 6 d’octubre de 2016

En mai d’aquò, dins un comunicat de premsa, lo president considèra que las condemnacions son “en desfasament total amb l’edat e la personalitat dels condemnats, e es tot parièr amb la situacion politica insulara”. E mai, lo president considèra “l’emocion e lo sentiment d’injustícia” coma “legitims e partejats”.
 
De fach, las reaccions e las cridas a manifestar son nombrosas, segon çò que rapòrta U Ribombu.
 
 

	Declaracion finala de Niculaiu Battini davant la Cort d’Assisas Especiala de París.    Dòna Presidenta, Dònas e Sénhers Magistrats de la Cort,   A l’anonci del requisitòri de Dòna Avocata Generala, de susmautas e de vivas reaccions an agut luòc en Corsega. Me pensi que depend de ma responsabilitat de reagir a prepaus d’aquò. Teni a dire que compreni los sentiments de revòlta qu’animan una granda partida de la joventut de mon país.   Entendi lo prejudici dont se pensa d’èsser victima cada còp que son condemnats d’autres enfants del pòble còrs per lor engatjament politic. Dins aquel sens refusi de condemnar qui que siá. Pasmens, coma soi convencut de la necessitat d’una patz definitiva, apèli oficialament a la calma e a la retenguda.   Me soi exprimit aquí per testimoniar de l’existéncia del pòble còrs e de la legitimitat de sa lucha, sens cap d’espèr per mon pròpri sòrt. Cresi qu’ai facha la bona causida. Amb l’ajuda de mos conselhs e l’apièja d’eminents testimònis, espèri aver pogut expausar davant aquesta Cort la natura de nòstras aspiracions e las rasons de quaranta ans de conflicte. Sens res renegar de çò que sèm, soi persuadit que pervendrem a establir una patz duradissa assegurada per una democracia sana e viventa al servici d’una nacion còrsa reconeguda.   Mon sòrt es vòstre. Quina que siá vòstra decision, entendi de demorar lo patriòta que soi e de participar, per mas modèstas competéncias, a l’emancipacion de mon pòble sus sa tèrra, dins l’amaisament, la cooperacion e la reconciliacion.