De milièrs de grècs manifestèron dissabte e ièr dimenge a Salonica contra una nòva vesita de la troika e la possibilitat de mai de reduccions budgetàrias.

Tornarmai la troika vesita Grècia amb la menaça de mai de reduccions budgetàrias. Los inspectors dels tres organismes compausant la troika —Comission Europèa, Banca Centrala Europèa e Fons Monetari Internacional— arribèron ièr dimenge e poirián impausar un nòu ajustament d’11,6 miliards d’èuros.
 
Fàcia a aquò, qualques 20 000 grècs manifestèron dissabte de ser a Salonica. Lo centre de la vila foguèt encerclat per qualques 3500 policièrs antisusmautas.
 
Dimenge, se debanèron qualques manifestacions pendent tota la jornada. La mai importanta foguèt la dels sindicats, que comptava amb la preséncia del cap del partit d’esquèrra Syriza, Alexis Tsipras.
 
A miègjorn, qualques 1300 policièrs e pompièrs manifestèron per exigir que se lor redusiguèsse pas mai lo salari.
 
Los inspectors de la troika vòlon determinar se Grècia complís los objectius e se pòt recebre un nòu tròç del salvament. Es previst que s’entrevisten amb lo ministre de las Finanças, Giannis Stournaras.
 
Del sieu costat, lo primièr ministre, Antonis Samaras, que se reünís uèi amb la troika, s’amassèt ièr amb los caps dels partits que lo sostenon per preparar lo rendètz-vos. Totes son reticents per introdusir de nòvas reduccions budgetàrias. Samaras, pasmens, considèra que “i a pas cap d’autre camin” qu’aquelas nòvas mesuras d’austeritat “per que Grècia recupère la credibilitat”.
 
Segon los mèdias locals, las reduccions budgetàrias afectaràn las pensions e los salaris publics.