Lo president francés, François Hollande, elegit en mai amb la promessa d’evitar l’aumentacion de las mesuras d’austeritat, s’es vist obligat de prene de mesuras d’estalvi per aténher l’objectiu de deficit europèu. O expliquèt ièr de ser a TF1. S’agirà de la reduccion budgetària mai fòrta dels darrièrs trenta ans. Après respondre a las questions dels jornalistas, Hollande anoncièt los fòrts ajustaments budgetaris.

Lo govèrn a de besonh d’aténher 33 miliards d’èuros per arribar a un deficit de 3% en 2013. Per capitar, aprovarà una fòrta aumentacion de la pression fiscala, equivalenta a qualques 20 miliards d’èuros; Le Journal du Dimancheavançava que serián entre 15 e 20 miliards en citant de fonts anonimas del govèrn.
 
Quand ganhèt las eleccions presidencialas, Hollande anoncièt ja la siá intencion d’aumentar la pression fiscala sus las fortunas superioras al milion d’èuros. Aqueles plans pòdon aver ocasionat l’iniciativa de l’entrepreneire Bernard Arnault, l’òme mai ric de França, de demandar la nacionalitat bèlga. Arnault es proprietari d’una seguida d’entrepresas de luxe que compren la marca Louis Vuitton, e ditz qu’o fa per de motius estrictament professionals. Ça que la la siá demanda coïncidís amb lo debat sus la possibilitat que las rendas mai nautas paguen 75% de las taxas.
 
Lo president francés anoncièt qu’aprovarà una taxa de 75% a las personas que ganhan mai d’un milion d’èuros per an, taxa que serà temporala pendent dos ans. Las entrepresas que non tornen investir los lors beneficis, mai que mai las grandas, pagaràn tanplan fòrça taxas. Per çò qu’es de las reduccions budgetàrias dins lo govèrn, totes los ministèris las patiràn, a l’excepcion dels d’Interior e Educacion.