La societat multinacionala coreana de tecnologia Samsung anoncièt ièr que fabricariá pas pus son telefonet Galaxy Note 7. E mai s’èra previst qu’aquel aparelh venguèsse lo referent dels telefòns intelligents d’ongan, lo dispositiu s’incendiava en se cargar e podiá quitament espetar. Ara, la societat n’a degut arrestar la produccion e cessar de lo comercializar, e recomanda als que n’auràn un, que l’amòrten e quiten de l’emplegar.
 
Samsung a anonciat que los usatgièrs qu’auràn un modèl Galaxy Note 7 lo poiràn cambiar contra un autre modèl, un Galaxy S7 o S7 Edge, e la societat tornarà la diferéncia de prètz.
 
Aquel disfoncionament del modèl favorit de Samsung a causat una revirada a la societat, que tombèt ièr d’8% a la borsa de Seol. En mai d’aquò, calculan que la retirada del Galaxy Note 7 provocarà que la societat quite d’encaissar 15 miliards d’èuros.