La polícia francesa a trobat un amagatalh d’armas en Picardia, susceptible d’èsser del grop armat basco ÈTA. En tot son “un centenat d’armas de ponh” que son estadas descobèrtas aqueste dimècres 12 d’octòbre durant una operacion de la polícia judicària e de la sosdireccion antiterrorista (Sdat). La descobèrta l’an facha gràcias “a un long trabalh d’enquèsta menat conjonchament per las polícias espanhòla e francesa, çò precisa una font pròcha del dorsièr.
 
Las armas èran amagadas dins qualques bidons enterrats dins un bòsc de la comuna de Carlepont.
 
Los enquestaires de las fòrças de seguretat francesas e espanhòlas considèran que s’agís de l’arsenal que la banda terrorista voliá liurar per scenificar un nòu procès de negociacion de la patz.
 
Pasmens, dimars passat, lo ministre interimari espanhòl de l'Interior, Jorge Fernández Díaz, barrèt tornarmai la pòrta a quina negociacion que siá. “Lor cal liurar las armas e certificar lor decès en fasent publica lor dissolucion. ÈTA es un cadavre e solament li manca d’expedir son certificat de decès”, çò diguèt lo ministre.
 
ÈTA anoncièt en julhet de 2014 lo desmantelament de sos mejans destinats a la lucha armada, que comprenon “las estructuras logisticas e operativas derivadas de la practica de la lucha armada”. En març passat, lo grop armat publiquèt un comunicat en planhent qu’après cinc ans d’alta al fuòc, lo procès de patz foguèsse pas començat pr’amor que i a pas agut de dialòg amb los estats espanhòl e francés, ni mai amb las fòrças politicas bascas, levat lo Bascoat Nòrd.
 
Lo darrièr còp que se confisquèt un important arsenal d’ÈTA foguèt lo 28 de mai de 2015 a Biàrritz (Bas Ador).