Se tendrà uèi a partir de 15h dins la glèisa de Montsegur, una ceremònia ont l’evesque de Pàmias, Jean-Marc Eychenne, demandarà perdon per la Crosada contra los catars. Coma o anoncièt la diocèsi de Pàmias, Coserans e Mirapeis, se demandarà “perdon al Senhor d’aver participat per certans dels nòstres membres e certanas de las nòstras institucions a d’actes contraris a l’Evangèli”. E mai se la crosada concerniguèt solament una partida del país, uèi, 16 d’octòbre de 2016, es un jorn istoric per Occitània tota.
 
La celebracion serà pas una messa mas una liturgia amb de presas de paraula. Es aquí que Jean-Marc Eychenne farà sa demanda de perdon en nom de la glèisa d’Arièja, car sas competéncias van pas delà. En mai d’aquò se compta amb l’intervencion de Claudi Martí, que cantarà sa coneguda cançon de Montsegur e la cantaira Muriel Batbie Castell qu’interpretarà divèrsas cançons en occitan, dont lo Pater Catar, çò que s’es pas jamai fach en de talas circonstàncias. En seguida, i aurà una marcha silenciosa devèrs lo sit de la Prada situada al dessús del pargatge que mena al castèl, lo veritable luòc ont los 225 catars moriguèron lo 16 de març de 1244 sul lenhièr de l’Inquisicion. Una procession amb de brancas de laurièr se farà al son del graile e de la bodega de Xavier Vidal e Claude Roméro.
 
L’eveniment comptarà amb de representants de la Glèisa catolica mas tanben de la vida publica, dont la comuna de Montsegur, e de representants de la cultura occitana.
 
 
E puèi?
 
La demanda de l’evesque de Pàmias pòt pas anar mai luènh que sa diocèsi. Pasmens, poiriá ben èsser represa se trobèsse un resson al Vatican. Dins aquel sens Benaset Roux remarca dins lo Blòg occitan de France 3 que lo contèxt actual es sens dobte favorable e que lo Papa Francés se poiriá interessar a aquela cambada venguda del País de Fois en demandant un perdon mai general a respècte de l’Inquisicion. Lo papa deu vesitar l’estat francés en 2017 o 2018.
 
En mai d’aquò, l’evesque de Pàmias serà present a Tolosa lo 19 de novembre que ven per un collòqui entitolat “Convivéncia, un novèl art de viure ensems”, amb de representants de totas las religions, d’atèus e d’animistas.
 
 
L’idèa vendriá de l’occitanisme
 
Segon nòstres confraires occitanofòns de France 3, l’idèa de demandar perdon nasquèt de diferentas convèrsas amb divèrsas personas crestianas de la memòria ferida per la crosada e per lo simple fach de tuar al nom de Dieu. Lo pòrtavotz episcopal, lo paire Edouard Laportalière, explicava que la cantaira Muriel Batbie Castell permetèt qu’aquelas personas se retrobèsson. A la prima passada, l’evesque Eychenne vesitèt Joan Francés Laffont a l’Ostal d’Occitània e puèi consultèt los Dominicans, car, a causa de lor participacion al masèl dels catars, son sensibles a l’eveniment. Puèi se decidiguèt la data del 16 d’octòbre.
 
 
La temptativa de 1998
 
Es lo primièr còp que se demandarà perdon per aquel crime, e mai s’en 1998 i aguèt una temptativa amb lo “Manifèst per la reconciliacion”. S’agissiá d’una letra de tres paginas enviada al Papa Joan Pau II a l'iniciativa del cònsol de Tolosa Dominique Baudis, lo president de Convergéncia Occitana Joan Francés Laffont, l’abat Jòrdi Passerat, Bertran de La Farge, Patrick Lasseube e un vintenat d’occitanistas que volguèron interpelar la Glèisa per que reconeguèsse sas fautas.
 
Precisament en aquel moment cresèron trobar la despolha del comte Raimon VI de Tolosa dins un sarcofag, mòrt excomuniat e enterrat secretament dins la ciutat mondina, e se teniá una demanda de levada d’excomunicacion de son filh Raimon VII.
 
L’an 2000 lo Papa Joan Pau II aviá formulat una demanda de perdon dins un document entitolat “Memòria e reconciliacion”, mas èra una demanda tròp generica que fasiá pas cap de referéncia als catars.



Montségur le 16 octobre 2016por france3midipyrenees