Lo president de la Generalitat de Catalonha a explicat als ciutadans franceses lo procès de Catalonha e Aran devèrs lor independéncia. O faguèt diluns passat dins una conferéncia a l’Institut Sciences Po de París, e puèi dins l’emission Grand Soir de France 3.
 
La conferéncia èra entitolada “Quin avenir de Catalonha en Euròpa?” e sa tòca èra d’explicar tot lo procès complet d’independéncia dempuèi sas originas fins a la situacion actuala. Puigdemont defendèt lo procès independentista coma “totalament pacific e democratic”. E apondèt: “Lo movement de las gents es estat lo grand motor d’aquel camin devèrs l'independéncia. Serà lo pòble de Catalonha que s’exprimirà e deurà decidir a tot moment”. Après explicar lo refús constant de l’estat espanhòl de negociar qué que siá amb lo govèrn de Catalonha, diguèt que son govèrn aviá decidit que lo camin èra d’obténer la validacion de l'independéncia per mejan del referendum. Lo president remembrèt qu'aquela determinacion d’exercir l’autodeterminacion aviá lo sosten de l’80% dels ciutadans de Catalonha e Aran.
 

A París hem explicat les raons de la independència i per proclamar-la després del referèndum. A @sciencespo, a @France3tv i a @FRANCE24

— Carles Puigdemont (@KRLS) 17 d’octubre de 2016

 
“La responsa al conflicte politic deurà venir d’Euròpa”
 
Puigdemont expliquèt tanben que la responsa de l’estat espanhòl es de portar quina decision que siá de las autoritats catalanas als tribunals. Pasmens, indiquèt que la solucion al conflicte vendriá pas de l’estat espanhòl, mas de la comunautat internacionala. Sèm convencuts que la responsa a aqueste conflicte politic vendrà pas de Madrid, mas deurà venir d’Euròpa, a causa dau defalhiment de l’estat espanhòl”, çò diguèt, en tot apondre que “Catalonha deu aver un ròtle clar davant los enjòcs d’Euròpa, de la Mediterranèa e del Mond”.
 
 
Una oportunitat
 
En mai d’aquò, Puigdemont expliquèt que “l’independéncia es una aspiracion legitima, coma o es estada la de plan d’autres païses que son venguts independents dins los darrièrs decennis”. E apondèt: “Volèm ara la nòstra oportunitat, e mai o volèm d’un biais nòstre, a la catalana, amb exemplaritat, democracia, pacificament, amb civisme e respècte, pas coma un problèma mas coma una oportunitat”.
 
 
Al Grand Soir de France 3 e sus France 24
 
Puèi, dins l’emission Grand Soir de France 3, Puigdemont defendèt lo procès devèrs l’independéncia. “Avèm un mandat clar de la populacion catalana. Avèm un sosten parlamentari sufisent. Quand òm es un politician democrata, òm deu obesir a la populacion”, çò diguèt.
 
Aquí, lo president de Catalonha expliquèt que lo nòu estat independent èra “pus viable” e sustot donariá “un avenir clar als nòstres joves”. Pasmens, per Puigdemont, “l’independéncia es una question economica, de finançament, d’infrastructuras, mas Catalonha es tanben una nacion d’Euròpa amb sa lenga e sa cultura e deu èsser respectada coma tala”.

 



Tanben France 24 faguèt una entrevista de Carles Puigdemont. Aquí lo president i expliquèt lo detalh del procès e sa fuèlha de rota e diguèt net e clar, que se lo referendum se ganhava, proclamariá l’independéncia de Catalonha e Aran.