Lo govèrn escocés a dich a Brussèlas qu’Escòcia deu poder manténer una relacion amb l’Union Europèa malgrat lo Brexit. E a presentat l’independéncia coma “una de las opcions”, e mai s’es pas la sola per i pervenir. Lo ministre del govèrn escocés cargat de las negociacions pel Brexit, Michael Russell, diguèt, dins un collòqui a l’Ostal d’Escòcia de la capitala bèlga, que seriá “intellectualament desonèst” d’escartar l’opcion de declarar l’independéncia per protegir la relacion dels escoceses amb l’UE. Russell expliquèt que l’executiu que lo dirigís Nicola Sturgeon aviá l’imperatiu democratic de protegir los interèsses d’Escòcia dins l’UE.
 
“L’independéncia es una opcion, o deu èsser, seriá intellectualament desonèst e incomplet se diguèssem pas qu’es una de las opcions (per seguir dins l’UE), e per aquela rason deman publicarem un borrolhon de lei de referendum”, çò diguèt dijòus passat. “Es una de las opcions, mas pas la sola”, çò precisèt. En mai d’aquò, Russell apondèt que i aviá pas encara de negociacions perque lo govèrn britanic a pas activat l’article 50 dels tractats per quitar l’UE.
 
Segon Russell, Edimborg vòl garentir qu’aurà d’influéncia sus las discussions entre Londres e Brussèlas, e mai s’aurà pas cap de cadièra, çò sembla. Per aquela rason, Russell interpelèt dirèctament lo public del collòqui: “Cinc milions de ciutadans que son europèus, e que vòlon contunhar d’o èsser, lor cal almens aver lo drech d’o dire”. Lo ministre admetèt que los estats voldràn pas interferir dins las questions intèrnas del Reialme Unit, coma l’eventuala independéncia, mas soslinhèt que caliá comprene lo foncionament constitucional britanic e que lo 62% dels escocesses avián votat en favor de contunhar dins l’UE e poirián èsser forçats a la quitar contra lor volontat.
 
“Volèm trabalhar de manièra constructiva per obténer lo drech de protegir la plaça d’Escòcia en Euròpa”, çò diguèt Russell pendent lo discors a la delegacion escocesa de Brussèlas. “Coma govèrn, sèm totjorn totalament engatjats a trobar una solucion qu’ofrisca un bon resultat pel pòble d’Escòcia, que votèt majoritàriament en favor de contunhar dins l’UE”, çò remarquèt. Pel govèrn escocés, la prioritat es de protegir sa plaça dins lo mercat unic, coma tanben los dreches dels europèus que demòran en Escòcia e los dels escocesses que demòran dins la rèsta d’Euròpa.
 
Russell es anat a Brussèlas pel primièr còp, amb la ministra escocesa dels Afars Europèus, Fiona Hyslop, per far divèrsas reünions e per defendre la vision “positiva” de son govèrn devèrs l’UE. Russell e Hyslop se son reünits, entre d’autres, amb lo negociator del Parlament Europèu pel Brexit, lo liberal bèlga Guy Verhofstadt; amb la presidenta del comitat dels Afars Constitucionals de l’Eurocambra, la polonesa del Partit Popular Europèu Danuta Hubner; e amb qualques èurodeputats escoceses, tant del Partit Nacional Escocés (SNP) coma del Partit Trabalhista.