Èra una anciana revendicacion dels ensenhaires occitanofòns per l’ensenhament public e sembla que vendrà una realitat. I aurà fin finala una agregacion per la lenga occitana, çò es un concors de professors de l’ensenhament segondari e superior.

La ministra francesa de l’educacion, Najat Vallaud-Belkacem, a confirmat qu’una demanda d’agregacion per la lenga occitana, coma per la lenga còrsa, es absoludament legitima. Atal o exprimís la ministra dins una letra de responsa al president de la FÈLCO, Yann Lespoux: aqueste demandava de novèlas de la promessa que lo primièr ministre francés, Manuel Valls, avián facha als còrses sus una agregacion e se las autras lengas mal nomenadas regionalas ne poirián beneficiar, segon çò que publicava ièr La Setmana.
 
Valls vesitèt Corsega en julhet passat ont refusèt, davant l’Assemblada de l’illa, la cooficialitat del còrs. “La Republica a una sola lenga oficiala, lo francés, car ela es practicada per totes”, çò afirmèt. Pasmens, lo primièr ministre francés anoncièt la nòva agregacion de “lenga e cultura còrsas” e la creacion d’un vintenat d’emplecs dins l’acadèmia en tot reafirmar la tòca d’una filièra bilingüa dins cada establiment escolar.
 
Ara, dins sa letra de responsa al president de la Federacion dels ensenhaires occitans, la ministra de l’educacion francesa precisa que “l’enjòc de la creacion d’una agregacion pertòca totas las lengas regionalas ensenhadas en França”. En mai d’aquò, anóncia qu’a demandat a l’Inspeccion Generala de l’Educacion nacionala francesa e a la Direccion Generala de las Ressorsas Umanas d’integrar la lenga occitana dins las diferentas mençons que comprendrà l’agregacion en lengas nomenadas regionalas.
 

Una convencion-quadre amb l’ÒPLO
 
Del ponch de vista mai general que l’agregacion, la ministra ajusta que “las òbras preparatòrias d’una convencion-quadre amb l’Ofici Public de la Lenga Occitana (ÒPLO) e las cinc acadèmias pertocadas deurián abotir plan lèu”. Aquestas acadèmias son cinc de las onze subdivisions escolaras que tòcan Occitània dins l’estat francés: tres en region Nòva Aquitània e doas dins la region qu’a pres lo nom d’Occitània.

 
 
 

---

La Setmana: Ensenhament : lèu-lèu una agregacion en lenga occitana !