A Perpinhan (Catalonha), an reüssit d’empedir l’expulsion d’una familha armènia que demòra dins l’estat francés dempuèi cinc ans. La famiha, compausada d’una femna e sos dos enfants, se trobava assignada a residéncia dins l’ostalariá Avenir de la capitala nòrd-catalana. La nuèch del dimècres 19 al dijòus 20 d’octòbre, un vintenat de militants de Comitat de Sosten al Collectiu de Sens-Papièrs de Perpinhan se rassemblèron davant la pòrta de l’ostalariá, e reüssiguèron d’evitar lor expulsion, çò rapòrta Directa.
 
Los militants bloquèron la pòrta de l’establiment al moment qu’una patrolha de la PAF (la polícia de las frontièras francesa) i anèt menar la familha devèrs Tolosa, d’ont avián previst de los expulsar devèrs Armenia. En tot veire la mobilizacion, la polícia demandèt a la femna se voliá partir e ela refusèt. Alavetz, los policièrs renoncièron mas van reportar una nòva data per l’expulsion. Ara, riscan d’èsser empresonats tres ans, car segon la lei francesa, acceptar pas l’expusion dins l’estat francés es un delicte.
 
Lo paire de la familha en question foguèt expulsat fa qualques setmanas. L’arrestèron e lo menèron al Centre de Retencion Administrativa de Ribesaltes. “La justícia demandèt que sortiguèsse del Centre sens li retirar l’obligacion de quitar lo territòri. Li daissavan qualques setmanas abans una possible expulsion. Quand el volguèt sortir del Centre, trobèt de policièrs davant la pòrta e lo menèron sul pic a l’aeropòrt, direccion Erevan (Armenia). Se poguèt verificar cossí la prefectura vesiá clarament que lo volián expulsar, qué que diguèsse la justícia”, çò rapòrta lo collectiu de Sosten.
 
Es pas lo primièr còp qu’aquela familha es atacada per l’administracion. En estiu de 2015, la prefectura dels Pirenèus Orientals menava en justícia Denis Lambert, un òme acusat d’aver lotjat la familha armènia. Pasmens, la prefectura capitèt mal car acusava un òme en se basant sus una lei qu’existís pas. Alavetz la prefècta èra Josiane Chevalier, qu’èra estat prefecta de Tarn quand se produguèt l’assassinat de Rémi Fraisse. Ara, lo departament occitanocatalan a cambiat lo prefècte, mas pas son obsession de percaçar los migrants sens papièrs. “Los atacs se multiplican contra los «sens-papièrs» e avèm l’impression qu’aquela familha es venguda un simbòl. La prefectura lor vòl far pagar la malescasuda del jutjament de Denis”, çò rapòrta a Directa Natacha, del Comitat de sosten.
 
 
Una circulara demanda d’accelerar “ara urgentament” los procèsses d’expulsion dels migrants “sens papièrs”
 
Dempuèi l’an 2012, la circulara Valls establís que lo limit de residéncia dins l’estat francés es de cinc ans per poder regularizar una familha. Mas segon lo comitat de sosten, la prefectura ignòra aquela circulara. En mai d’aquò, lo 16 de setembre passat, los ministèris de l’Interior e del lotjament franceses publiquèron una nòva circulara que demandava d’accelerar “ara urgentament” los procèsses d’expulsion dels migrants “sens papièrs” qu’an pas obtengut lo drech d’asil.
 
Lo cas d’aquela familha armènia en Catalonha Nòrd es pas lo sol, mas es una illustracion de la situacion dins l’estat francés. Après que se foguèt decidit de desmantelar los camps de migrants de Calais e de mandar sa populacion dins tot l’Exagòn, la drecha racista, fòrça enrasigada en Catalonha Nòrd, e pertot en Occitània, a fach campanha contra l’arribada d’aquelas personas, coma o avèm ben remarcat a Besièrs.