A un repais associatiu organizat pels parents de la Calandreta lo Cigal de Bisa de Menerbés, vegèri sus la taula un flascon d’un produit nomenat: Ketch’Òc. Cerquèri a ne saber mai e trapèri l’iniciatritz de l’afar: la Valeria Tubeau, del Jardin de Valérie d’Agel.

Lo Ketchup Agricòla Occitan
 
Me diguèt que per elis lo Ketch’Òc es un Ketchup Agricòla Occitan: “Es una idèa panada a nòstra filha, qu’a dètz ans e qu’es a Calandreta. Coma totes los pichons, aima plan lo ketchup. Coma sèm productors de legums, nos sèm dits, amb lo Dàvid: “Anam ensajar”. Avèm fait qualques ensages, qualques recèptas que faguèrem tastar a la dròlla e a sas amigas de Calandreta. Una recèpta a reçauput l’aprobacion d’aquesta jurada pas aisida! Alara, del còp, nos sèm lançats. Ramenta çò que fasián las mametas amb lo tomatat. Se rajusta totjorn un pauc de sucre e vinagre que fan un conservador natural, pas besonh d’aditiu e puèi, una pasteurizacion a caud. Res de mai a ajustar. La composicion es tomatas, cebas, alh, espècias, un pauc de vinagre e solament un 5% de sucre. Mas las espècias es tòp-secret: vos dirai pas çò que i a dedins!
 
Lo Ketch’Òc es una salsa per acompanhar las carns o las pastas plan mens grassa que la maionesa, e coma i a pas gaire de sucre, los pichons agantaràn pas de carias. S’i pòt tanben rajustar de tapenas, de ferigola, e metre en salsa amb quicòm mai; se pòt tanben calfar un bricon.
 
Lo Ketch’Òc se presenta dins un flascon cilindric amb, de segur, la crotz occitana sul tampet. La presentacion es originala qu’avèm rajustat una lengueta de demarcacion: quand se dobrís se sap qu’es fresc e que degun l’a pas dobèrt abans vos!
 
En mai del Ketch’Òc, fasèm tanben de confituras e tanben gelarèias originalas. Dins las confituras, fasèm las classicas mas tanben qualques unas mai originalas. Atal, fasèm la classica pastèca-irange, mas ne preparam una autra amb limon verd-gengibre, un gost novèl. Ensajam de tornar metre la confitura de pastèca a l’òrdre del jorn. Fasèm tanben de tomatat, de tomatas confidas, de gelarèias de pebrina o de ferigola,... que se pòdon manjar amb de formatges.
 
Nòstres produits se trapan dins de magasins de Menerbés o a L’Oulibo a Bisa. Sèm presents al mercat a Olonzac cada dimars, a Sanch Inhan lo dijòus e lo dimenge e avèm una pichona botiga a Agèl, dobèrta lo divendres de 6 oras a 7 e mièja del vèspre.
 
 
La fèsta de las cogordas
 
Fin octòbre-debuta de novembre, es la fèsta de las cogordas. N’avèm sèt o uèit varietats diferentas, de la pichona a farcir fins a aquela per la sopa, coma la butternut, la buttercup, lo potimarron que se pèla pas. Es tanben lo temps dels pòrres, dels caulets, de las ensaladas que tornan prene coma la doceta, e lèu la frisada e l’escaròla. Es la fin per las merinjanas e los pebrons. La tardor es plan arribada.
 
 
 
 
Alan Roch