Del temps que la celebracion oficiala de la “Diada”, lo jorn nacional de Catalonha, revendica un pache fiscal amb l’Estat espanhòl, una manifestacion independentista se debanarà de ser. Se prevei que s’agirà d’un fach istoric e la preséncia occitana serà considerabla.

“Catalonha, nòu estat d’Euròpa” es la lèma de la manifestacion de la “Diada” convocada per l’Assemblada Nacionala Catalana (ANC). Se prevei que serà istorica, tant per la granda quantitat de partits, entitats, collectius e ciutadans qu’an dich que i participarián, coma per una donada pas jamai vista: i a mai de mila autobuses que l’ANC a reservats per portar de manifestants a Barcelona. Qualques trens son tanplan reservats e se sap pas quantes autobuses son reservats pels partits e per las associacions.

L’independéncia de Catalonha pòt èsser un espèr per Occitània, segon qualques collectius occitans. País Nòstre, lo Partit de la Nacion Occitana e lo Partit Occitan an apelat los lors sòcis a participar a la manifestacion. Qualques sòcis de Libertat! seràn tanplan presents. Iniciativa per Occitània tanben sosten la manifestacion.

La manifestacion començarà a sièis oras del ser al caireforc del Passeig de Gràcia amb la Gran Via de les Corts Catalanes. L’organizacion demanda de remplir tot lo Passeig de Gràcia abans de començar de partir. Lo percors virarà a la Gran Via, davalarà la Via Laietana e s’acabarà davant lo Parlament de Catalonha.

La comuna de Barcelona a dessenhat un dispositiu per garentir la mobilitat e per que la vila pòsca recebre totes aqueles autobuses. Lo mètro, lo tram e las linhas de tren refortiràn los lors servicis e aumentaràn la frequéncia de las linhas a l’escasença de la manifestacion.

L’ANC a fach una crida per que la manifestacion siá completament pacifica; a demandat als manifestants d’ignorar totas las provocacions que i pòsca aver e que se denóncie las actituds violentas. L’entitat a fach una seguida de recomandacions dins aquel sens. Vertat es que se pòt remarcar d’intranquillitat dins los sectors mai espanholistas, mai que mai dins qualques partits e mèdias.

Es possible de manifestar per Internet. D’un autre costat, lo sit 11s2012.cat amassarà totes los piulets faches sus Twitter e totas las fòtos publicadas sus Instagram qu’empleguen las etiquetas #11s2012 e #11sCAT9estat. Aquel sit serà mes a jorn cada cinc minutas.

Al delà, l’ANC a demandat a totes los manifestants de portar un carton verd per “far visible çò que ja dison los sondatges: que dins aquel país, sèm ja una majoritat los que volèm l’independéncia. Farem una marèa verda de libertat e de democracia per que se veja clarament dempuèi tot lo Mond. Volèm demostrar pro clarament a totes los politicians catalans qu’es arribada l’ora d’iniciar lo procès de secession”, çò dison a l’ANC. Lo cartonet se pòt far a l’ostal e qualques jornals de papièr ne distribuiràn.

L’11 de setembre, los catalans se remembran de la casuda de Barcelona en 1714 davant las tropas borbonosas. Lo País Valencian casèt en 1707 e Malhòrca en 1716. Aquela desfacha representèt la fin de las institucions catalanas e la castelhanizacion del país.