Au Ostens, hens las Lanas girondinas, la caperòta de Rètis que’s tròba suu camin de las Lanas. Mei precisament sus la rota que mia a Capsús, quartièr de la parròpia de Viganon, adara restacada a Mostèirs, abisa deu departament de las Lanas. Autorn d’aquera vielha gleisòta, lo dissabte 22 de seteme, jornada deu patrimòni, l’associacion deu “Caça-Can”, de Loishats, que gavida Dauna Claudia Rouquié,  qu’a programat un bèth programa. En fin de matiada, de cap a 11 òras, un especialista de l’arquitèctura romanica e de las pintruras que harà ua presentacion de la capèra de Retis. Justa davant lo repaish, lo Miquèu Baris qu’assegurarà un aperitiu-condes shens faiçonejar.
 
Au vrèspe, de cap a 4 òras e a gratis, en la capèra medisha de Rètis, que i aurà l’espectacle "Suus camins de Sent-Jacme... e de la transumància deus pòrcs". Qu’enteneràn “Ultreia”, lo cant deus romius. Que vederàn la diferéncia entre “camin romiu o camin deus pòrcs”. Lo Michel Gardie, dens lo ròtle deu porcatèr, racontarà l’istòria de “Crabina e Crabilhon”. Dens aqueth país de naudas, braus, e autes marèsc, lo Miquèu Baris condarà, eth, la legenda de “Las laguas de Naviars”, pescada deu costat de Lencoac e Bessaut, aqueths lòcs perduts de las Petitas Lanas de Rocahòrt. Que gostaràn tanben l’istuèra de “L’ermitatge de Sent Trasibula” mei quauquas autas... Un detalh qu’a la soa importància: lo monde que son pregats de’s portar un sèti plegant o un chèiròt;  o lavetz se sheitaràn per tèrra per non pas estar tròp viste cansats, pr’amor la vrespada que durarà de cap a 1h30. L’espectacle, condes e musica (dab la vriulonaira Babeth Gardie), que serà acompanhat d’un montatge "power-point" tà sostiéner e illustrar los tèxtes.  Entresenhas: +33 (0)5 56 88 56 02.
 
 
 
 
Joan Jacme Fénié