L’operacion a Mossol de las fòrças iraquianas e de sos aliats peshmergas, e tanben de la coalicion internacionala menada pels Estats Units, per prene lo contraròtle de l’autoproclamat Estat Islamic, poiriá anientar aqueste en Iraq, e per tant serà mai aisit de lo combatre en Siria. Ara, degun sap pas çò que se passarà en Siria quand aurà desaparegut l’Estat Islamic. Per aquela rason VilaWeb prepausa un rapòrt sus las dètz possiblas guèrras que, segon los expèrts, poirián esclatar après l’avaliment dels jihadistas.

1. Curds contra arabis (e turcs)
 
Los soldats curds, tant de la region autonòma d’Iraq coma de Rojava dins l’estat sirian, son estats en primièra linha del combat contra l’Estat Islamic, e los mai eficaces. Gràcias a aquò an meritat lo sosten internacional, mai que mai, dels Estats Units, que vei pas d’un marrit uèlh l’idèa d’un estat independent curd, almens dins la zòna iraquiana. Israèl tanben o sosten.
 
La region curda autonòma d’Iraq es ja, de facto, un estat independent, quitament amb son armada pròpria que participa d’una manièra remarcada a la liberacion de Mossol. Qualques caps politics curds considèran qu’après la desfacha de l’Estat Islamic, cal metre l'independéncia de Curdistan sus la taula. Mas aquò poiriá desencadenar una nòva guèrra, entre los curds e los arabis, amb l’ajuda de Turquia.
 
 
2.Turquia contra los curds de Siria
 
Tre que las tropas turcas intrèron en Siria, se vegèt pro clar que luchavan pas solament contra l’Estat Islamic, mas tanben contra los curds. Per Turquia es fòrça important d’empedir la consolidacion de zònas independentas curdas en Iraq o en Siria, per n’empachar la contagion sul territòri curd que l’estat turc ocupa e reprimís.
 
 
3. Los curds de Siria contra lo govèrn de Siria
 
Aquela guèrra comencèt fa longtemps, mas l’ofensiva contra Estat l’Islamic l’a mesa a un segond plan e i a agut quitament d'episòdis fòrça concrets de collaboracion. Quand l’Estat Islamic serà desfach, lo govèrn de Siria ensajarà de recuperar lo contraròtle de tot lo territòri e doncas farà la guèrra contra las regions autonòmas curdas de Rojava.
 
Sus aquel possible conflicte, cal prene en compte que dins la zòna i a de petitas unitats de l’armada estatsunidenca que sostenon e entraïnan la guerrilha curda de l’YPJ. Amb l’aument de la retorica antiamericana en Turquia e lo raprochament de Turquia devèrs Russia, quin incident que foguèsse dins aquela zòna poiriá derivar rapidament devèrs un conflicte màger.
 
 
4. Los Estats Units contra lo govèrn de Siria (e Russia)
 
Potencialament es la guèrra pus perilhosa. Als Estats Units creis la volontat de crear una zòna d’exclusion aeriana en Siria per arrestar los bombardaments sus Alèp. Hillary Clinton a mes en evidéncia qu'es dispausada a prene aquela mesura. Mas aquò significariá l’afrontament dirècte entre los Estats Units e Russia, que son aviacion ajuda lo govèrn sirian. Qualques unes creson qu'aquò desencadenariá la Tresena Guèrra Mondiala.
 
 
5. Turquia contra Siria
 
Turquia es intrada en Siria per combatre l’Estat Islamic e tanben los curds. Mas se n’anarà? Istoricament, a tengut de contencioses territorials importants amb Siria e es de bon pensar que voldrà tornar dessenhar la frontièra actuala mai al sud, en aprofechant la feblesa del govèrn sirian.
 
De fach, Siria reconeis pas oficialament l’annexion del sandjak d’Alexandreta, l’actuala província turca d’Hatay. Las mapas sirianas contunhan de mostrar aquel territòri coma un element de Siria del temps qu'en Turquia i a de grops que revendican una part de l’actual nòrd del país.
 
 
6. Los curds d’Iraq contra lo govèrn d’Iraq
 
Aquela possiblitat sosten que se poiriá debanar una version de l’afrontament entre curds e arabis mas circonscricha solament a Iraq. Totun, sembla fòrça malaisit qu’aquela possibilitat se passe sens contaminar Rojava e Siria.
 
La basa de l’afrontament seriá lo despartiment del territòri conquistat a l’autoproclamat Estat Islamic. Las fòrças curdas contraròtlan uèi de zònas largas de territòri que fan pas partida de la region autonòma curda mas que, dins fòrça cases, son pobladas per de curds. Lo govèrn iraquian reclama que tornen jol contraròtle de Bagdad, mas mentre que se ten la guèrra, ne fa pas una causa de confrontacion. Òr, quand la guèrra serà acabada, la situacion serà plan desparièra.
 
 
7. Los curds d’Iraq contra las milícias shiitas (e Iran)
 
Los curds se poirián s'afrontar al govèrn iraquian, mas se poirián tanben acarar a un enemic pas tant institucional, las milícias shiitas. Aquelas milícias, amb lo sosten d’Iran, an participat fòrça activament a la lucha de las darrièras setmanas contra l’Estat Islamic, en atacant pel sud mentre que los curds atacavan pel nòrd. E ja se son afrontats dirèctament, almens dins la batalha de Tuz Khurmatu.
 
En mai d’aquò, los curds d’Iran son tornats a la lucha armada, çò que logicament inquieta Teheran.
 
 
8. Curds contra curds
 
La division intèrna dels curds es importanta e ocasionèt una guèrra civila dins las annadas nonanta. De las doas faccions principalas dels curds d’Iraq, una defend d’establir un país unificat amb lo Rojava curd de Siria e l’autra non. Los desacòrdis poirián capitar mal.
 
 
9. Sunnitas contra chiitas
 
La lucha contra Estat Islamic a unit de sunnitas, de curds e de shiitas, que son anats liberant de vilas, sens prene en compte de quin grop èran. Pasmens, i a agut de denóncias d’abuses dins fòrça cases e es evident que las relacions entre los tres, mai que mai entre los dos grands blòcs arabis, son fòrça dificilas. La guèrra civila devastèt ja Iraq e es pas estada completament acabada, e doncas se poiriá reviscolar e tornar a desequilibrar lo país.
 
 
10. Las rèstas de l’autoproclamat Estada Islamic contra totes
 
La batalha per Mossol significa gaireben la destruccion de l’Estat Islamic, perque es la principala vila que ten encara. Mas en Siria las rèstas del grop se refugiaràn e defendràn a mòrt Raqqa, la capitala de lor autoproclamat califat. I intrar serà fòrça malaisit e seriá quitament possible qu'una de las autras nòu guèrras esclatèsse, çò que permetriá a l’ Estat Islamic de resistir mentre que sos enemics se destruson entre eles.