Lo parlament del Reialme Unit deurà votar se lo govèrn pòt començar lo procès de separacion de l'Union Europèa, conegut coma lo Brexit, segon çò qu’estimèt ièr la cort suprèma britanica. La justícia considèra que lo govèrn a pas lo poder d’invocar l’article cinquanta del Tractat de Lisbona, que permet d’entamenar las negociacions realas sul Brexit.
 
Lo jutge suprèm, Lòrd Thomas de Cwmgiedd, reafirmava la decision del tribunal en assegurant que “la lei mai fondamentala de la constitucion de la Grand Bretanha es que lo parlament es sobeiran”.
 
Per ara i a pas agut cap de reaccion formala de la primièra ministra, Theresa May, o del govèrn. Pasmens lo ministre del comèrci a ja reagit en disent que lo govèrn es decebut del jutjament. E mai, segon la BBC, l’executiu farà apèl de la decision. May a reïterat mai d’un còp sa volontat d’activar l’article cinquanta a la fin del mes de març. Una mesura que, segon ela, se deu far en consultant lo parlament.
 
Pe contra, l’UE a dich que pensa pas negociar qué que siá, quitament pas la lenga dins la quala se tendràn las convèrsas, fins que l’article cinquanta siá aplicat.
 
Que lo parlament britanic vòte la sortida de l’Union Europèa pòt èsser la mòrt del Brexit, car a l’ora d’ara la majoritat de deputats son contraris a la partença de l’UE. En mai d’aquò, cal prene en compte que lo Brexit s’impausèt solament amb lo 51,9% dels vòtes.