Occitània es pas un país racista e xenofòb, e mai se las informacions e los resultats electorals poirián far pensar lo contrari. Los abitants de la Val de Ròia (Comtat de Niça) an desfisat la pression politica, policièra e judiciària per ajudar los migrants, e ara riscan la preson.

Lo 23 de novembre que ven, dos abitants de la Val de Ròia, Cédric Herrou e Pierre Alain, seràn jutjats per aver portat socors a de migrants e de refugiats. “Un delicte de solidaritat”, çò afirma un de lors avocats a Marseille infos autonomes.
 
La Val de Ròia es venguda lo nòu ponch de passatge dels migrants de l’estat italian al francés après la barradura de la frontièra a Ventemilha. Aquel ponch de passatge vei cada jorn de desenats de migrants se pèrdre sus las estradas e los camins de montanha. Espontanèament, d’abitants los venon ajudar. Son organizats al sen de l’associacion Ròia Ciutadana, e refusan d’abandonar los migrants, sovent afamats e perduts.
 
Cédric Herrou es un agricultor de 37 ans conegut per aver albergat en cò sieu plusors centenats de migrants. Foguèt detengut en agost passat e puèi mes en libertat. Mas ara serà jutjat per “ajudar lu estrangiers en situacion irregulara”. “Ajudar non deuria èsser un drech mas un dever”, çò assegurava Herrou a Nice-Matin, en precisant que sa tòca “non es de far passar li gents mas de li extraire dau perilh”.
 
En nom de l’associacion Ròia Ciutadana, Herrou demanda “la legalitat per portar assisténcia”.