Lo sindic d’Aran, Carlos Barrera, e la conselhièra de l’administracion publica de la Generalitat de Catalonha, Meritxell Borràs, signèron divendres passat un acòrdi de finançament d’Aran per 2016 per un montant total de mai de 22 milions d’èuros. D’aquel argent, 60 000 èuros devon èsser destinats a la promocion e a l’usatge social de la lenga occitana d’Aran, 142 500 al desvolopament de l’espòrt e al Centre dich “de Tecnificacion”, e la rèsta deu anar a la cultura, al territòri e a l’entrepresa. La tòca d’aquel transferiment es d’arribar en l’an 2016 amb un acòrdi de finançament definitiu, coma es indicat dins la lei d’Aran.
 
Borràs soslinhèt la bona sintonia entre los govèrns de Catalonha e d’Aran. “Sèm pas arribats encara a la fin l’annada e avèm ja un acòrdi”, çò diguèt en tot precisar que ja i a una comission “que trabalha per establir un nòu modèl de finançament estable, coma o estipula la Lei d’Aran de 2015”.
 
De son costat Barrera se mostrèt tanben satisfach e soslinhèt la bona disposicion del govèrn de la Generalitat per satisfar los besonhs del territòri. “Avaloram positivaments er acòrd de finançament, en tot tier en compde qu’es pressupòsti dera Generalitat son prorogadi, er increment ei important e demòstre sensibilitat e capacitat de negociacion”, çò diguèt.
 
Barrera expliquèt als mèdias que durant la reünion avián tanben parlat d’autres aspèctes, coma lo besonh de dotar d’un poder mai grand la Comission d'Urbanisme de la Val d'Aran e lo fach que las decisions se prengan al país. Barrera tanben demandèt que la preséncia de l’ors en Aran se gerigèsse al país e que lo govèrn de la Generalitat reconeguèsse las federacions esportivas aranesas a respècte dels espòrts d'ivèrn, de caça e de pesca.