Dissabdes passat se tenguèt per lo quatresme còp a Garait (Nauta Marcha), a l’iniciativa de l’associacion L-PEA (Lutz sus las Practicas d’Elevatge e d’Abatatge) en aliança emb d’autras associacions (CLAMA, OABA, NOVISSEN...), una manifestacion de protesta contra l’establiment de la dicha bòrda-usina daus mila vedeus a Sent Marçau lo Vielh (Montanha Lemosina), projecte portat per la SAS Aliança Miuvachas, sus lo planetge de Miuvachas, rasís la Cortina. A pauc près 500 personas manifestèren maugrat lo freg e l’aiga en se’massar prumier davant la prefectura puei en desfialar per las charrieras, passant, en credar daus eslogans, davant Intermarché que serà lo client principau de la bòrda-usina via sa filiala Jean Rozé.
 
Lo projecte de bòrda-usina es un projecte d’elevatge intensiu que deu aculhir de 1000 a 1400 vedeus per los engraissar. Lo projecte es portat per daus ancians de la FDSEA Corresa, sostengut per la perfectura de Cruesa e ajudat per lo Ministeri de la Defensa (per ajudar a la reconversion d’un ancian site militar). Los opausants fan remarcar que lo projecte vai a l’encontra daus dispositius que son a se desvolopar en matèria de benèsser animau. Aitanben la Confederacion Païsana, lo Modef (sindicat agricòla d’inspiracion comunista) e daus pitits productors se declaran contra queu projecte en denónciar de las practicas industrialas que son a l’opausat de lors conviccions que privilègian las filieras cortas e localas.
 
Fau saubre que los centres d’engraissament aculhissen los vedeus quand an 8-9 mes e que l’i demòran après 9 mes lo temps que prenhan dau pes davant que los menen au tuador puei los vendan coma charn (raviòli...) aus país de l’entorn mediterraneu. Pargats per 15-16 dins daus bòxs de 47 m² (en tirar lo 10 m² de la partida per minjar ente se podràn pas coijar), los vedeus auràn pas mai de 3m² chascun installats directament sus un sòu de betum e sens jamai veire lo mendre coston d’erba verda. La vaccinacion prèvia e l’emplec massís daus antibiotics serà tanben mai que necessari emb tau una promiscuitat. Los vedeus seràn nuirits mercés ad una meschanta alimentacion importada facha de chauleta e de bigarròu. Segon lo partit politic EELV, lo projecte pòt mas’chabar per far froion coma se vei emb d’autres centres d’engraissament intensiu dins la plana dau Pò en Itàlia (ente nasquèt quela practica emb los vedeus d’Itàlia) ente l’i a pertant plan mai de qué nuirir lo bestiau emb la produccion locala que non pas en Lemosin. Chausissen de mai en mai dins la plana dau Pò de far venir las cerealas directament per las vendre pusleu que per engraissar los vedeus.
 
Au mes d’aost passat, lo tribunau administratiu de Limòtges a declarat caduca l’autorizacion d’espleita dau centre d’engraissament, desavoant entau lo prefecte de Cruesa, per’mor que lo delai de tres ans dempuei l’autorizacion d’espleita èra pas estat respectat. Sola la SAS Aliança Miuvachas a fach apel. Totparier, maugrat la decision de justícia, an començat de far entrar los vedeus e d'organizar de las vesitas. Semblariá qu’aguèssen maugrat tot lo drech de far entrar quilhs vedeus per’mor d’un  marge de tolerància en dejós de 400 vedeus. Quò es un afar de segre.
 
Fau remarcar enfin que daus militants animalistas occitanistas faguèren ressonar la lenga nòstra dins los discors de dubertura de la manifestacion davant tots los manifestants presents e dau temps de la manifestacion.
 
 
 
 
Joan-Cristòu Dourdet