L’espectacle navèth deu Joan-Francés Tisnèr e deu  Jakes Aymonino, dab la Domenja Lekuona (lecturas) e lo Francés Dumeaux qui gratusa los sons aparelhs electronics, es estat presentat a Aunessa e Laharí. Òsca a l’associacion Aiga Viva (presidida preu Domenge Commet) qui a hèit vir en Grana Lana aquera creacion qui met en musica e imatges un bèth tròç de l’òbra deu Felix Arnaudin. Remercatz que l’òbra deu Bohèiròt se sufiseré tàd era medisha mes que cau ben ne tirar lo shuc d’un biais modernizat, mei dinamic. Aquò es lo dret e lo tribalh deus artistas. La creacion putza dens lo hons extraordinari, tirat vertadèirament deu desbromb dempuish que lo Parc naturau regionau de las Lanas de Gasconha a publicat las Òbras completas deu “Pèc” deu Monge (Edicions Confluences).
 
Imatges animats deu territòri deu “Felix” dab los chancaires que marchan sus la vielha  mapa de Cassini capvath Lúa, Comensac, Pissòs: bona idèa! Los noms de quartièr que desfilan: Peironvaquèr e Gualhard, a Lúa, on lo Felix vienè véder cosins e nebots, lo Monge on l’atenèva la Maria, goja fidèu e aimada, e los Tucs de la Garana on passava per caçar la lèbe. Los païsatges de grans pins eslindrats de la Brusa que semblan tocar a la “tela deu temps” (lo cèu dens lo lengatge imatjat deus vielhs aulhèrs), las scènas païsanas reconstituidas per lo “limatjaire” e las represas de cantas recuelhudas 100 o 120 ans a, ritman l’espectacle. Los nòstes bearnés de Salias espècian lo lor gascon deus accents deu parlar negue de la Gran Lana. Plasent d’ic enténer, sustot a Aunessa, dab un public vienut deu Bòrn e d’autes parçans de la Lana.
 
De temps en quan, l’espectacle, un chic anegat per l’usatge deus sons electronics, qu’a quauques longors mes lo ritme generau qu’es aniu, dinamic e muisha ua volontat de recèrca e de renovelament. Sostienuda, entre autes, per la regionassa “Nava Aquitània”, aquera creacion deveré interessar pro de monde.  Un còp passat lo periòde de rodatge, aqueths “Tralhaires” deisharàn, solide, tralhas pregondas.
 
 
 
 
Joan Jacme Fénié