Lo cònsol ultradrechista de Besièrs, Robert Ménard, conegut per sos episòdis de xenofobia, a fach tornarmai un gèst d’occitanofobia. Après suprimir lo festenal Fèsta d’Òc, ara ven decidir de pagar pas pus la contribucion de la comuna al CIRDÒC, çò rapòrta La Marseillaise. “Es un còp de ponhal dins l’esquina, un acte deliberat que nos pòt placer en situacion de crisi institucionala a partir del 1r de genièr”, çò planh Patric Roux, president del centre de documentacion occitan e conselhièr regional delegat a la cultura.
 
E mai se la comuna de Besièrs argumenta que fa “d’estalvis”, a causa de la bassa dotacion de l’estat, Roux denóncia una “rompedura istorica” e tanben la “postura ideologica” del cònsol ultradrechista. De son costat, la conselhièra regionala socialista se demanda se “Robert Ménard vòl èsser lo fossaire de la question occitana en Besierés”, e met en question los “estalvis” del cònsol que los fa pas “quand s’agís de far d’afichas”, en referéncia a un dels darrièrs episòdis racistas de Ménard.
 
 
De valors qu’agradan pas a Ménard
 
Fa pas gaire, lo CIRDÒC passèt una convencion amb la Liga dels Dreches de l’Òme sus la valorizacion lingüistica, que los representants menardistas del conselh municipal votèron contra ela. E ben, çò qu’enverina veritablament Ménard es lo contengut de las accions e de l’engatjament del CIRDÒC: “Defendèm de valors de tolerància, lo concèpte de «convivéncia» inventat pels trobadors”, çò explica Roux.
 
 
La Region cèrca de solucions
 
En 2017, lo budget del CIRDÒC se deviá situar a l’entorn del 1,1 milion d’èuros, dont  500 000 venián de la Region, 400 000 de fonzes europèus e 206 000 de la vila de Besièrs.
 
Ara, la Region promet de sostenir lo CIRDÒC e cèrca de novèls biaisses de finançament pel centre de documentacion. “Es pas perque Ménard esternuda que la Region tombarà malauta”, çò assegura Roux.
 
 
Un fons documentari occitan unic al Mond
 
Lo CIRDÒC es a l’ora d’ara un fons documentari unic al Mond dins lo domeni occitan, e constituís la sola bibliotèca exclusivament consagrada a una lenga e a una cultura minorizada dins l’estat francés. Aqueste patrimòni, enriquit d'un biais permanent a travèrs d’una politica d’aquisicions renfortida, a per tòca d’èsser una memòria viventa mesa a la disposicion de totes, grand public, estudiants, escolans, simples curioses o cercaires del Mond entièr.
 
Lo centre de documentacion, imprescindible per mantenir la cultura occitana, emplega 15 salariats e mena a bon tèrme mai de 800 projèctes culturals que genèran de retombadas economicas dins tota la region.
 
En 2011, lo centre lancèt lo portal numeric occitanica.eu ont se pòt consultar de nombroses libres e documents de la bibliotèca.