Lo president elegit dels Estats Units, Donald Trump, a promés qu’expulsarà o empresonarà immediatament tres milions d’immigrants clandestins o amb antecedents penals, un còp qu’aurà pres sas foncions. “Prendrem las gents amb un passat criminal, amb d’antecedents, de membres de bandas, de narcotrafegaires, probablament dos milions, que poirián arribar de n’èsser tres, e los tirarem del país o los embarrarem en preson. Los expulsarem de nòstre país. Son aicí illegalament. Quand la frontièra serà segura e quand tot se normalizarà, prendrem una decision sus aquelas gents, de gents terriblas”, çò diguèt dins una entrevista per lo programa 60 Minutes de CBS, emés diluns passat de ser.
 
Pendent la campanha, Trump diguèt quitament qu’expulsariá totes los immigrants en situacion irregulara. Ara o a circonscrit als qu’an comés de delictes.
 
 
Una muralha sus la frontièra de Mexic
 
Trump parlèt tanben de la promessa electorala mai polemica: lo mur amb lo qual vòl barrar la frontièra amb Mexic. L’entrevistaira, Lesley Stahl, li demandèt se pensava vertadièrament de bastir un mur, coma el o aviá dich pendent la campanha. “Òc”, çò respondèt net e clar Trump. Quand ela li remembrèt que qualques republicans avián dich qu’en plaça d’un mur podiá èsser una barralha, el diguèt: “Acceptariái una barralha dins qualques parts, mas en d’autras es mai adeqüat d’i bastir un mur. Soi fòrça bon en aquel afar. Es a dire la construccion”. Aquí lo president miliardari fasiá referéncia a sos afars.