Lo Cercle Occitan del País de Carcassona (seccion locala de l’Institut d’Estudis Occitans) tendrà son acamp de dintrada lo dimècres 19 de setembre dins son local de l’Ostal Sirventés (79, la Trivala a Carcassona), a 18h30.

Dobèrt a totas las personas interessadas, s’agís d’un acamp ont i seràn presentadas las activitats regularas del Cercle, mai que mai lo talhièr de lenga que començarà lo 26 de setembre.
 
Se i presentaràn tanben las activitats de l’an, que s’agís sustot de mòstras e de conferéncias. Aital serà presentada la mòstra “Temps de Nadal” que se farà per decembre e que s’agís d’una mòstra suls arbres de Josiana Ubaud.
 
Es de remarcar tanben, la setmana del rasim a Puègnautièr del 22 al 26 d’octobre e las jornadas 1212-2012 del 22 e 23 de novembre amb la presentacion de La Cansó per Cristian Salès e Anna Brenon lo dijòus e un balèti amb Brottò-Lopez lo divendres.
 
Per çò qu’es de las activitats de 2013, cal soslinhar las Felibrejadas en febrièr, lo Sirventés d’Estiu en julh amb una mòstra de fotografias d’Isabèla Bosquet,
 
Al delà d’aprestar lo carnaval de Carcassona, se parlarà tanben de las accions menadas amb d’autras associacions, e fin finala, se balharà d’informacions sus la setmana occitana del teatre municipal, qu’aurà loc a final de genièr de 2013 amb Sèm Fòrça per TIO-La Rampa lo dijòus 24 e un recital de Mans de Breish lo dissabte 26.
 
Solide, l’anar occitan al país serà un dels principals tèmas de l’acamp.
 
Entresenhas per e-mail o al tel. +33 (0)4 68 25 19 78.




Mirelha Braç