Se prepara a Marselha, lo 17 de decembre que ven, una accion de protèsta contra lo mesprètz de l’occitan al MUCÈM, lo Musèu de las Civilizacions d’Euròpa e de la Mediterranèa. Desplegaràn de 12h a 16h davant lo musèu una bandeiròla de dos mètres que pòrta en occitan l’article 14 de la Declaracion Universala dels Dreches Umans, e se repartirà un fuelh qu’explicarà la revendicacion de l’accion:
   
Lo MUCÈM s’inaugurèt lo 7 de junh de 2013 a Marselha dins l’encastre de las activitats de la Ciutat Focèa coma Capitala Europèa de la cultura. Bastit sus de tèrras ganhadas sus la mar, lo sit cèrca d’èsser un espaci màger d’analisi e interaccion de las divèrsas civilizacions de Mediterranèa long de l’istòria, mas ont la lenga e la cultura del país  son pas brica presentas. “Sos conceptors nos impausan una vision francofrancesa d’una cultura tecnocraticament formatada a París”, çò planh Josiana Ubaud dins una letra dobèrta als conservators del MUCÈM. Dins aquela letra, Ubaud se mòstra completament indignada a prepaus de l’abséncia de la lenga e la cultura del país, e critica la vision dels faches mediterranèus segon un “prisma desformant qu’a quitament pas la decéncia —a defaut de la conviccion— de valorizar un tant siá pauc la vila e la region d’aculhença del musèu”.