Èra lo primièr còp que la drecha francesa organizava una eleccion primària dobèrta a tot l’electorat de drecha e del centre per se causir un candidat a l’eleccion presidenciala de 2017. Amb mai de tres milions d’electors, es estat un succès. De biais espectaclós s’es confirmada la dinamica en favor de l’èx-primièr ministre François Fillon, mas delà las previsions dels sondatges. Amb mai del 43% dels sufragis, aqueste es luènh davant lo favorit dels sondatges, lo deputat-cònsol de Bordèu Alain Juppé, e l’èx-president Sarkozy, qu’anarà pas al segond torn.
 
Es una umiliacion bèla per Nicolas Sarkozy, president del partit Los Republicans, qu’esperava un revenge après sa desfacha en 2012 contra François Hollande. Sembla que l’ancian president de la Republica Francesa pague, amb son a pena 21% dels vòtes a l’encòp, son impopularitat e las acusacions de corrupcion a son entorn.
 
Tanben es una suspresa la segonda plaça per lo deputat-cònsol de Bordèu Alain Juppé, que foguèt un impopular primièr ministre de Chirac entre 1995 e 1997, e qu’èra lo favorit dels sondatges. Amb solament un 28% dels sufragis li serà complicat de tornar far son retard per esperar una victòria amb mai del 50% contra François Fillon. Los autres quatre candidats obtenguèron de resultats anecdotics, amb mens del 3% dels vòtes.
 
 
Un candidat ultraconservator e neoliberal
 
Contràriament a Alain Juppé, que se vòl donar un imatge de moderat amb lo sosten del cònsol centrista de Pau François Bayrou, François Fillon a un programa mai dur, amb un alongament de la durada de la setmana de trabalh dels foncionaris e la supression de mai de 500 000 emplecs dins la foncion publica. En 1982, ja deputat, votèt contra la despenalizacion de l’omosexualitat, e se mostrèt fòrça ostil a la dobertura del maridatge als omosexuals jos la presidéncia Hollande. Fa qualques meses, justifiquèt la colonizacion, e es tanben conegut per son ostilitat a las lengas dichas regionalas.