Lo patron de Facebook, Mark Zuckerberg, es darrièrament a l’origina de qualques polemicas. D’un costat per las trapèlas que fa amb las estatisticas de son sit. Puèi per la promocion d’informacions falsas e escandalosas e lo conflicte qu’an ocasionat en seguida de l’eleccion de Donald Trump. E durant la dimenjada passada, una fòto siá mostrava qu’a la camèra e lo microfòn de son ordenador cobèrtas. Una polemica mendre se la comparam amb las autras, mas se n’es parlat totun.
 
Zuckerberg se faguèt una fòto per festejar qu’Instagram èra arribat als 500 milions d’usatgièrs actius. Dins aquela fòto, que publiquèt sus Facebook, se pòt veire darrièr el son ordenador portable, un MacBook dobèrt. Qualques tecnicians n'an profechat per analisar qualques causas interessantas a prepaus de son ordenador. Per exemple, qu’emplega Thunderbird coma logicial d’e-mail, e Chrome coma navigador. Mas çò que mai a atirat l’atencion es lo petit bocin d’escòch que cobrís la camèra e una autra que cobrís l’intrada àudio, lo pòrt ont òm pòt installar un microfòn.


 
Lo debat arribèt còp sec: es paranoiac, Zuckerberg, o ben totes deuriam far coma el per evitar d’èsser espionats?
 
Amb l’informacion que tenèm, poiriam dire qu’es gaireben indiscutible que quin aparelh que siá, ordenador o telefòn mobil, pòt servir per nos espionar. Mas sabèm tanben qu'es pas simple de far un espionatge sus totòm sens distincion. Sabèm puslèu qu’ara òm pòt espionar en fasent un esfòrç e en determinant la persona per espionar.
 
Dins lo cas dels ordenadors Mac, coma lo qu'emplega Zuckerberg, espionar a travèrs de la camèra es mai complicat, perque, quand la camèra es en foncionament, s’aluca un lum que servís per avertir que la camèra es en marcha. Lo contraròtle d’aquel lum se fa amb lo material de l’ordenador per mejan d’un sistèma fòrça especial. Alavetz, la connectar de l’exterior estant amb un logicial luènch sens qu’òm o remarque es plan malaisit. Es pas impossible, mas prendrà fòrça mai de complicacion qu’o far amb un PC normal.
 
Per tant, se caldriá metre tota una banda adesiva per cobrir la camèra e la retirar solament quand nos conven? La responsa es que òc, sens cap de dobte, çò recomanda VilaWeb.
 
La majoritat dels usatgièrs emplegam pas totjorn la camèra, mas fòrça o fasèm de temps en temps. La cobrir amb un bocin d’escòtch o de papièr es pas brica complicat. Simplament quand cal emplegar la camèra, se descapèla e se torna cobrir puèi. Es una mesura de precaucion simpla e fòrça eficaça. En cas que qualqu’un prenga lo contraròtle de nòstra camèra, poirà pas res veire.
 
 
E l’intrada del microfò, la cal tanben cobrir?
 
Cobrir la camèra es una precaucion simpla e recomandable mas Zuckerberg cobrís tanben l’intrada del microfòn. E la deuriam cobrir tanben nosautres?
 
Aquò es un pauc mai discutible. Dins lo cas dels ordenadors Macintosh, i a una rason tecnica que los diferéncia de la majoritat dels PC, qu'es l’usatge d’un pichon engenh optic Toslink a l’intrada del microfòn. Quand aquel engenh s’activa, emet un pichon rai de lum dins la 650a porcion de l’espèctre visible. Aquò dobrís la pòrta a una oportunitat: qualqu’un poiriá enregistrar tot çò que se passa a travèrs del micròfon “en legissent” la lum amb un aparelh optic extraordinari, qu’es solament accessible per las grandas agéncias d’espionatge. Per ansin, es vertadièrament fòrça malaisit d’imaginar que qualqu’un pòsca aver pro d’interès e de ressorsas per nos espionar d’un biais talament malaisit e car. A nosautres. Benlèu si qu'a Zuckerberg…
 
Alavetz: metètz un bocin de benda adesiva o un tròç de papièr sus la camèra de vidèo, e vos inquietetz pas, per ara, per l’intrada del microfòn.