Una esquipa modèsta amb pauc mai de quaranta ans de vida, vaicí lo Chapecoense. Una istòria corta e plena de trabucs. Lo club, conegut coma “l’auragan de l’oèst”, a superat de malastres economics que l’an menat al lindal de la desaparicion divèrses còps. Pendent de decennis, l’esquipa s’es batuda contra l’ostracisme del fotbòl brasilièr. Dempuèi l’an 2014 jòga en sèria A, çò rapòrta VilaWeb.
 
Ara que començava de reüssir esportivament, lo malastre es tornat. L’avion ont viatjavan los membres de l’esquipa s’es escrachat sus la sèlva colombiana, près de Medellín, en provocant la mòrt de setanta cinc personas.
 
La setmana passada, après eliminar l’esquipa argentina de San Lorenzo, lo Chapecoense se classifiquèt per sa primièra finala d’una competicion internacionala, la Copa Sud-Americana. Son rival èra l’Atlético Nacional de Colómbia. L’organizacion del torneg obliguèt lo club de cambiar d’estadi perque lo sieu èra tròp pichon per aculhir la finala. Se causiguèt lo terren del Curitiba, a gaireben 500 quilomètres de distància de la vila de Chapecó. La primièra competicion de la finala la caliá disputar uèi, 30 de novembre, dins l’estadi Atanasio Girardot, e es per aquela rason que l’esquipa viatjava dins aquel avion devèrs la capitala d’Antioquia.
 
Es aital que los jogaires festejavan lor succès istoric:
 

Así celebraban los jugadores de Chapecoense su paso a la final de la Sudamericana, hace apenas una semana. pic.twitter.com/WAJJddrdAG

— El CoEquipero (@ElCoequipero) 29 de novembre de 2016

 
Al començament, los membres de l’esquipa devián viatjar amb un vòl chartèr dempuèi l’aeropòrt de São Paulo devèrs Medellín, mas l’Agéncia de l’Aviacion Civila brasilièra refusèt de donar lo permés de vòl a l’aeronau. Aquel fach obliguèt lo club de cercar una alternativa e de prene un vòl comercial de la companhiá LaMia. Amb doas oras de retard, l’esquipa del Chapecoense partiguèt de l’aeropòrt de São Paulo. Anavan pas devèrs Medellín mas a Santa Cruz de la Sierra, en Bolívia.
 

 
Dins l’aeropòrt de Viru Viru, l’avion faguèt un arrèst tecnic abans de tornar prene lo trajècte. Qualques oras puèi, près de Medellín, l’avion s’escrachava sus la zòna del Cerro Gordo. Lo pilòt raportèt a l’aeropòrt José María Córdoba que l’aparelh aviá de problèmas electrics. Segon Radio Caracol, l’avion espetèt pas dins l’accident, mas foguèt partejat en divèrses tròces.
 

 
Se pòt aquí veire l’itinerari del vòl abans de s'escafar:
 

The @AeropuertoMDE confirms LAMIA Bolivia RJ85, registration CP-2933 has crashed near Medellin, Colombia. https://t.co/ayIDZCJVZspic.twitter.com/GUzZcwHkwo

— Flightradar24 (@flightradar24) 29 de novembre de 2016

 
L’orografia del terren e lo tempèri an complicat lo socors. Dels ochanta un passatgièrs —dont vint e dos èran de jogaires del Chapecoense— solament ne subrevisquèron sièis. Un assistent de vòl, un jornalista brasilièr e tres jogaires: Alan Ruschel, Hélio Zampier e Jackson Follman. Segon lo jornal brasilièr Globo, Follman, de 24 ans, a perdut una camba e Ruschel, de 27 ans, a una lesion a l’espina dorsala e plusors fracturas als braces e a las cambas.