La Comission Europèa prepausèt dijòus passat de demesir la TVA que s’aplica als libres e als jornals electronics per que pòscan pagar la meteissa taxa reducha que las publicacions de papièr. Aquò cambiariá pas res dins l’estat francés, ont se paga la taxa reducha del 5,5% pels libres sus tot supòrt, e tanpauc dins l’estat italian ont la taxa es d’un 4%. Pasmens, cambiariá fòrça en Val d’Aran, ont se paga segon la lei de l’estat espanhòl qu’aplica un 21% de TVA per las publicacions electronicas fàcia al 4% de las publicacions de papièr.
 
En mai d’aquò, la proposicion europèa inclutz una seguida d’iniciativas per simplificar lo mercat numeric dins l’UE, dont la creacion d’un portanèl unic per pagar la TVA destinat a las societats que fan d’operacions en linha dins divèrses païses de l’UE. Aquela mesura ajudariá las entrepresas a far d’estalvis per aperaquí 2,3 miliards d’èuros per an.
 
A l'ora d'ara, las entrepresas de crompa e venda de produches en linha se devon enregistrar dins totes los estats membres ont vendon lors produches al moment de far las declaracions de TVA, çò que supausa una despensa d’aperaquí 8000 èuros dins cada país ont se fa d'operacions, e es un dels principals obstacles fiscals per aquelas societats. La proposicion de la CE es que lor calga far una simpla declaracion trimestrala de TVA al nivèl de l'Union Europèa.
 
Una autra proposicion es la simplificacion de la nòrma de la TVA per las microentrepresas e las entrepresas naissentas, amb un nòu lindal de 10 000 èuros per las vendas online. Las societats que seràn en dejós d’aquel nivèl de vendas poiràn contunhar d’aplicar las nòrmas de lor país d’origina. Tanben las PME beneficiaràn de nòrmas pus simplas per determinar ont pagan las taxas segon lors clients.
 
Segon lo secretari dels afars economics, Pierre Moscovici, aquelas mesuras reduiràn “lo temps perdut, simplificaràn la burocracia e amendriràn los còstes”.