Rugbi-piscina al Molin
 
Suspresa bèla dissabte a Sant-Estève en campionat d’Elèit 1 amb la victòria dels vesitaires: Sent Gaudenç suls Dragonets 20-10. Mai logica, la victòria de Vilanòva sus Tolosa: 32-6 .
 
Dimenge, Limós se deu emplegar per mestrejar Albi 32-22 e Avinhon fa pas de detalh dins sa recepcion de Palau: 46-10 e ne profeita per presentar lo libre de son centenari.
 
A Lesinhan, lo terren teniá per endreits l’aspècte d’una piscina. La pluèja tombèt per intermiténcia e Singlars de Corbièras e Canaris de Ciutat ensagèron de s’adaptar a aquestas condicions climaticas en privilegiant los desplaçaments al pè e los còps de pè a seguir. A aquel jòc, Carcassona menava a la pausa 14-10. Dins lo segond temps, Lesinhan marquèt un ensag transformat que sufiguèt per faire la diferéncia: 16-14. Lo FCL confòrta atal sa primièra plaça.
 
Pel compte de la novena jornada, doas partidas atiran l’atencion: Dragonets-Limós e Carcassona-Avinhon que se jogaràn dissabte 10 coma Tolosa-Albi. Dimenge 11 de decembre, Sent Gaudenç/Lesinhan e Palau/Vilanòva d’Òlt completaràn las oposicions.
 
 
 
Lo rebomb de la pauma
Croniqueta occitana del n° de novembre de 2016 de XIII-Magazine)
 
Soi un balon (una palma) de rugbi de 13. Soi mens pesuc que lo papeta de cuèr, que se conflava quand banhava e que caliá plan doas mans per lo téner (ieu, me sarran dins una sola patassa). Mas el, èra tot solet per ocupar los jogaires. Ieu, me trapi amb quatre o cinc collègas e, quand sortissèm de l’airal, de pichons jògan amb nosautres (o nos cèrcan) e me cal esperar un moment per tornar a l’òbra.
 
M’arregali de passar de mans en mans, mas me demandi perqué lo dobertura me fot de còps de pè e me fa montar dins lo cèl a descrocar la Luna, o alara un pichon còp de pè que me fa redolar pel sòl d’un costat de l’autre.
 
E quand arribi darrièr la rega blanca, n’i a totjorn un per me quichar sul ventre e m’aplatussar l’esquina sul terren (mas coma soi oval sabi pas brica ont se trapa mon ventre e ont se trapa mon esquina). E lo tustaire me pausa a son biais sus la besonha per me mandar entre los pals. M’arregali de jogar amb lo vent per decidir d’i passar o pas: de còps, vau potonejar un pal!
 
Entre tenguts e mesclanhas, soi un grand coneisseire dels talons dels jogaires. De còps, me trapi sens res a faire quand l’arbitre demanda a son assistent o al vidèo se l’ensag es valable: es un afar plan complicat. Alara, d’unes me vòlon faire venir bionic amb una piuse o una camèra dins ma punta per balhar mon punt de vista o per prene ieu la decision!
 
Mas me podètz faire tot çò que voldretz, ieu, contunharai de rebombar a mon idèa!
 
 
 
 
Alan Roch