Los neerlandeses an votat per la moderacion e l’europeïsme dins las eleccions parlamentàrias marcadas per la crisi economica. Los liberals (VVD) del primièr ministre Mark Rutte an ganhat las eleccions amb 41 sètis al Parlament neerlandés que n’a 150; s’agís de 10 sètis de mai que los qu’avián fins ara. Seguisson los trabalhistas de Diederik Samsom, amb 39 representants. La formacion de govèrn es, doncas, pels dos partits majoritaris; e la lor orientacion dependrà de qui serà fin finala lo primièr ministre. Los liberals son mai pròalemands e los trabalhistas mai pròfranceses.

Dins los lors discorses après los resultats, Rutte disiá las siás tòcas del mandat que ven, del temps que Samsom, lo cap trabalhista, s’ofrissiá ja coma partenari. “Los resultats son un impuls amb la nòstra politica en matèria de seguretat e d’immigracion; e es de contunhar amb lo cors politic dels darrièrs dos ans”, çò diguèt Rutte quand se començava de saber los primièrs resultats.
 
Lo grand vencut en aquelas eleccions es lo Partit per la Libertat (PVV) de Geert Wilders, que prepausava de sortir de l’èuro, amb 15 sètis (9 de mens). Los socialistas mantenon los 15 representants qu’avián fa 2 ans.
 
Pendent la campanha, lo primièr ministre, Mark Rutte, demandava als votants l’oportunitat d’acabar lo prètzfach realizat pendent aqueles dos ans, que lo govèrn (aliat amb la democracia crestiana e los antimusulmans) i a aplicat de reduccions budgetàrias de 30 miliards d’èuros.
 
Segon qualques sondatges, la majoritat dels neerlandeses an paur que las ajudas a de païses coma Grècia o Espanha se repercutiscan negativament sus la lor qualitat de vida, en fasent montar lo prètz del sistèma sanitari e en far davalar las pensions.
 
Los Païses Baisses an celebrat cinc eleccions dins los dètz darrièrs ans. En abril passat, lo govèrn de Rutte tombèt pr’amor que lo PVV arrestèt lo sieu sosten dins de negociacions per aprovar de nòvas reduccions budgetàrias.