Una nòva reforma judiciària metriá la jurisdiccion francesa pus nauta “jos lo contraròtle dirècte” del govèrn, segon çò que planguèt publicament la quita Cort de Cassacion dimècres passat. Lo primièr president d’aquel naut tribunal, Bertrand Louvel, e lo procuraire general, Jean-Claude Marin, publiquèron un corrièr que reclamava d’explicacions al primièr ministre francés, Bernard Cazeneuve, e sollicitèron d'el que los recebèsse.

Meton en causa un decret del 5 de decembre de 2016 que reforma “l’inspeccion generala dels servicis judiciaris”, es a dire, que l’executiu contraròtle las jurisdisccions judiciàrias, çò rapòrta Le Point. Aquel contraròtle se limita ara a las jurisdiccions “de primièr e de segon gra”, es a dire, los tribunals de granda instància e las corts d’apèl. Lo decret del 5 de decembre suprimís aquela precision, çò que fa que la Cort de Cassacion intre de facto dins lo camp de l’executiu.

La Cort de Cassacion es la jurisdiccion francesa pus nauta e ara se contraròtla ela meteissa, en fasent un còp per an un rapòrt sus son foncionament a l’ocasion de sa rintrada solemna. Tanben pòt èsser auditada per la Cort dels Comptes, que velha sul bon usatge de l’argent public.

Es pas brica frequent que los caps de la Cort de Cassacion interpèlen l’executiu. Pasmens Le Point remembra que Louvel e Marin o faguèron tanben en octòbre passat per reprochar al president francés François Hollande de prepauses sus la “coardiá” dels magitrats, citats dins un libre dels jornalistas Gérard Davet et Fabrice Lhomme.

Courrier du Premier président de la Cour de cassation et du Procureur général au Premier ministre @BCazeneuvehttps://t.co/PivyAo8vfcpic.twitter.com/OryQUaEtzr

— Cour de cassation (@Courdecassation) 7 de desembre de 2016